Sena Mwaabala Mali Aayandika?
1 Imukwesu naa mucizi uuciswa zimwi ziindi ulakonzya kuyeeya kuunka kuyakusilikwa kudolopo naa kucisi cimbi. Eeci inga caba akaambo kakubula cibbadela afwaafwi naa kutabota kwacibbadela eco cinyenzi. Alimwi cilakonzya kuba akaambo kakuti basilisi baliko tabayandi kuteelela caboola kumakani aabulowa aboobo kutegwa atobele “kuyiisya kwa bunaleza” kujatikizya kulikasya kulya bulowa mulwazi ulakonzya kuyeeya kuya kumbi. (Incito 15:28, 29) Ikuti naa mulwazi naa mukwasyi wasala kucita boobo, nguni weelede kubbadela mali oonse aayandika? Naa ambweni mulwazi oyu wakazwa kudolopo limbi wafwa kucibbadela kacisilikwa, sena mukuli wambungano zinyenzi izili afwaafwi acibbadela ikulibambila mali aajatikizya bubambe bwa malila? Bamwi balakonzya kabatazi kabotu ncobeelede kucita. Pele ikulanga-langa busolozi bwa Bbaibbele kujatikizya mukuli wamukwasyi cipa kuti twaambe makani aaliboobu:
2 Mali aakusilisigwa: Oyu mukuli wamulwazi amukwasyi wamulwazi. (Ba-Galatiya 6:5; Ba-Roma 13:8) Nokuba boobo, kuti kakubee mali aayandika manji kwiinda ngobanga bakonzya banamukwasyi, bamukowa balakonzya kugwasya. (Amukonzyanisye a 1 Timoteo 5:4.) Aaba babikkilizya basimukowa batali Bakamboni ba Jehova. Alimwi bamukwasyi kwiinda mulugwasyo lwa baalu bayooyanda kuziba kabotu-kabotu naa kuli bubambe buli boonse mfulumende mboijisi kujatikizya lugwasyo lwamali aya. Nzila zyoonse ezi zyeelede kulangilwa limwi kamutanaijatikizya mbungano. Aino, kuti naa kuli bakwesu bamwi baziba penzi eeli balaangulukide kugwasya cakulisungula kufumbwa mpobakonzya. (Amubone Olinganizidwa Kutsiriza Uministala Wathu, amapeeji 122-3.)
3 Imbungano ijatikizigwa buyo ciindi nokutakwe banamukwasyi bakulanganya mukwesu alimwi ccita buyo kuti kazibidwe kuba muntu wakkala kwaciindi cilamfu mulusyomo. Nokuba boobo kulakonzya kubuzigwa kuti, ino njiili mbungano iilaa mukuli oyu? Sena nimbungano kwakazila mulwazi naa nimbungano eyo iili afwaafwi acibbadela oko nkwabede ino mulwazi? Cakutadooneka, njiyeeyo mbungano kwakazila mulwazi. Ibaalu bakooko balimuzi muntu oyo alimwi abukkale bwakwe. Nokuba boobo bamwi bakwesu balaunka kuzibbadela zili kudolopo naa kucisi cimbi akuminya mbungano nyenzi oko. Tabatoleeli cakulya naa mali aabo beni naa abaabo babasindikila. Kanjikanji inga tabajisi mali aakubelesya bapiluka aboobo mbungano iili afwaafwi acibbadela ilasinikizigwa kubalanganya. Eeci taciluzi pe alimwi tacili ca mumagwalo. Ibantu beelede kuti kabalibambilide kubelesya kufumbwa zintu nzyobajisi ciindi capenzi liliboobo kwiinda kuminya bakwesu.
4 Ikulibambila kuyandika: Ikuunka ku kusilikwa kudolopo naa kucisi cimbi ncintu cakulisalila. Pele bakwesu tabeelede kuunka kabataninga bala mali aayandika kusaanguna akubona naa inga bakonzya kucita oobo. (Amukonzyanisye a Luka 14:28.) Aboobo inga caba camaanu kuti naa mukwasyi naa muntu wabuzila limwi mali ayooyandika kubusena oko nkwaya katana nyamuka. Ikuti kakuli kucisi cimbi ncibotu kubuzya opesi lyamutabi. Mpoonya opesi lyamutabi lilakonzya kubuzya mutabi wamucisi nkomuya kutegwa bajane malailile amwi ayandika kumukwasyi kujatikizya basilisi azibbadela. Bakuopesi lya mutabi balakonzya kubazibizizya limwi bakumutabi bamucisi eeco, iciindi nomuyoosika a busena nkwayoosilikilwa mulwazi. Ibapegwa malailile ayo, ibanamukwasyi balakonzya kuyaambele kulibuzila-buzila akulanga-langa makani ajatikizya kulonga kuya kubusena bupya. Aino makani mbuli aakuti naa muntu oyo weenda ngusikumwaya uubbapatizidwe naa pe alimwi akuti naa ulaa ciimo cibotu kumbungano yakwe nkwazila ayooyandika. Munzila eyo iba Hospital Liaison Committee bamucisi eco cimbi inga balombwa kuti kabalaa afwaafwi kupa lugwasyo luliloonse lunga lwayandika kuti kakukonzyeka.
5 Ikuti naa muntu waunka kucisi cimbi kuya kusilikwa, tayelede kuyeeya kuti bamutabi naa bakwesu bamumbungano zinyenzi mbabayoomubbadelela lweendo lwakwe antoomwe amali aakusilisigwa. Ikuti naa bakwesu banyenzi mbaabi cakuti bakonzya kumupa aakukkala mulwazi oyu uuyaabupona naa basimukowa bamulwazi bamuswaya, tatweelede kucibweza mbuli kuti mulimo wabakwesu banyenzi ikupa buyo aakoona naa cakulya, kapati kuti kakubee abo basamausigwa boobo balakonzya kupa cimwi cintu kugwasilizya mukwasyi kutegwa babbadele mali ayo ayungizigwa. Alimwi kunyina weelede kuyeeyela kuti basilisi balakonzya kusilika kakutakwe kubelesya bulowa kuti naa kwakanyina kubandika kwakacitilwa limwi akuzuminana kumwi cakuti uyoosilika kakunyina kubelesya bulowa. Nkumuka kapati kuti mwalindila ciindi ncomutolwa kubusena bupandudwa nomuya mwaambile sikupandula kuti muli bamwi ba Bakamboni ba Jehova.
6 Mali aa Malila: Zimwi ziindi nokuba kuti mulwazi waunka kudolopo limbi kuyakusilikwa, ulafwa nkukwenya kuya. Mumasena amwi tubunga twabaalu abakutausi twalikulubizya kwiinda mukubamba makkomitii masyoonto-syoonto alo aunka kubakwesu abacizi mumbungano zili afwaafwi acibbadela kuyabubalomba kusanga mali aamalila. Nokuba boobo, ikutobela malailile aali apeeji 122 mubbuku lya Uministala Wathu tulajana kuti mali aamalila ali antoomwe a ‘kugwasilizya kulubazu lwakumubili kuli baabo bayandika lugwasyo mbuli bacembeede, ibaciswa naa bajisi mapenzi amwi.’ Aboobo njiisyo zyatondezyegwa atalaawa izili mubbuku lya Uministala Wathu zilabeleka akumakani aamalila.
7 Ikwaateelelesya malailile aya kuyoopa kuti umwi aumwi azibe cakucita kumakani aamali aakusilisigwa alimwi amali aamalila.