Nkaambo Nzi Ncotweelede Kuba Balondo Kumuswaangano Wesu?
1 Mulimo Wesu Wabwami wa March 1997 wakajisi cibalo cijatikizya bulondo. Mincali 12 kusika ku 14 yakatuyeezya mbokuyandika kuba balondo kumiswaangano yesu. Nzyeezi ziyeezyo zisyoonto. Amuyeeye kuti kubamba busena bwamuswaangano kuti kabusalala tauli mulimo wacibeela cakusalazya pe, toonse tweelede kubelekela antoomwe.
2 Ibusena buswaanganinwa bweelede kuti kabutakwe kabala. Kulasolekwa kapati kubamba masena aaswaanganinwa akwaasalazya katutana sika. Nokuba boobo musule kwali mapenzi aamatombe aasowailwa abasimuswaangano. Kufwumbwa ncotuleta kubusena buswaanganinwa, ceelede kutolwa anze kubikkilizya tukwese, mabbodela azimwi-zimwi. Ikuti katukonzya kuzileta kubusena buswaanganinwa nozizwide nkokuti tulakonzya kuzitoleela anozitakwe cintu. Tulakonzya katujisi zisani zisalala, mabbusu alimwi amasyu aaŋaima pele kuti katuzingulukidwe matombe sena tulibalondo ncobeni?
3 Kumiswaangano imwi, mikwasyi ilida zyakulya zyabo mubusena buswaanganinwa. Eci cili kabotu pele tatweelede kubikka tombe liticaale kusika kumamanino aamaprogilamu. Bamana kulya cakulya camasikati, mukwasyi omwe-omwe weelede kusalazya matombe oonse ngobabikka. Toonse tweelede kubikkila maanu kumakani aya. Imikwasyi minji icita mbuli kuti kuli pobwe abusena mpobakkede. Tulabona mabbodela aatajisi cintu, tusinsya, zyakulya zyaloka-loka, tukwese, mapepa aakucimbuzi naaba mapepa aaprogilamu yamuswaangano zilaalabene mpobakkede alimwi kababoneka kuti tabalibwene tombe ndobacita. Twamana kulya masikati atuzibwezelele zyoonse zili munsi lyesu akuzisowa. Mulakonzya kuletelezya kakwese mwalo mukwasyi moukonzya kubikka zyakulya ziloka-loka, tusinsya alimwi atombe limbi kutegwa zisoogwe muzingungulu naa zilindi zyasigwa kumuswaangano. Kunyina tombe lyeelede kucaala alimwi oonse mabbodela aazinyugwa aatakwe cintu ayelede kupilusigwa kucibeela ca zyazyakunywa kacitana talika cibeela cakumazuba. Mwalombwa mutalekeli mabbodela aatakwe cintu mukati kwiile kwaalabana munsi lyanu, alakonzya kuleta ntenda alimwi taakondelezi pe kulanga.
4 Ikuti kamujisi ŋanda naa cidumba kumuswaangano, amubone kuti acilawo awo mpomukkala kulasalala. Ibana balakonzya kuyiisigwa kukukula akubweza tombe kutola kubusena bubambidwe bwakusowela tombe.
5 Ino mbuti kumakani aatubi twabantu? Kumasena amwi aamiswaangano mipati, ipenzi lipati kwiinda ndyakubamba tubi. Izimbuzi zilabija cakuti tazicibelesegwi pe. Ibbuku lya Lukkomano Mumukwasyi lyaamba kuti: “Umwi mulawo akati kayeeyo wakali kujatikizya kusowa tubi twamuntu, twalo twakeelede kuzikka kulaale acilawo kutegwa abusena aakkala bantu atasofwaali. (Deuteronomo 23:12, 13) Oyo mulawo wansiku ulakonzya kugwasya asunu. Noliba sunu bantu balaciswa akufwa nkaambo tabautobeli.” Izimbuzi zyacilindi naa zyakugwejula inga nkozili kuzilawo zyamuswaangano. Kunyina weelede kukkala cikkale-kkale akusiya tubi aatuba. Eci cilaleta malwazi ciindi nokubungene bantu banji abusena busyoonto. Kunze lyaboobo tununka bubyaabi kuli Jehova akubantu. Jehova waamba kuti uyootufwutatila aakubona cintu cuusya nsoni akati kasu. (Amweezyanisye Deuteronomo 23:14.) Aboobo ncintu ceelede kuti katuli balondo kutegwa bukkale bwesu bweendelane azyeelelo zyakwe. Toonse atusoleke lyoonse kuba balondo munzila yakumubili alimwi akutasofwaazya cilawo cesu kutegwa Jehova ‘ataboni cintu cuusya nsoni mulindiswe.’
6 Tuyanda kuti katulisumpula akaambo kamasena eesu aaswaanganinwa. Kuzwa lino toonse “atulisonzole busofwaazi boonse nibuba bwamubili nibuba bwamoyo, atulondole busalazi bwesu cakuyoowa Leza.” (2 Ba-Korinto 7:1) Atutwiiye tulengwa twabulondo kumunzi, atuyiisye bana kutola lubazu mukusalazya ŋanda. Atubwiiye bulondo ku Ŋanda ya Bwami alimwi iciindi notuswaangana antoomwe mumiswaangano mipati naa misyoonto, kubungana kwesu akube kwakuyaka zyeelelo zisumpukide zya Leza wesu uusalala Jehova.