Zyakwaambilizya

◼ Mabbuku aakumwaya mu September: Inzila Yakujana Lukkomano Mumukwasyi. October: Kulembya kwa Ngazi Yamulindizi naa Awake! naa oonse obile mamagazini. Ikutalikila muciindi camamanino camwezi, Makani aa Bwami No. 35 ayakumwaigwa. November: Ikumwaisigwa kwamakani aa Bwami No. 35 kuyoozumanana. Imbungano izyamana kukambauka mucilawo ncozipedwe kwiinda mukusikila bantu boonse bali mumaanda a Makani aa Bwami No. 35 balakonzya kumwaya bbuku lya Luzibo. December: New World Translation abbuku lya The Bible—God’s Word or Man’s?

◼ Mulangizi weendelezya naa uumbi buyo muntu uutumidwe anguwe weelede kulingula maakkaunti aambungano mu September 1 naa kufwambaana kucita boobo aciindi cimbi kuzwa buzuba oobo. Amwaambilizye kumbungano mwamana kucita boobo.

◼ Ikuti naa mwabona kuli citondezyo cakugwisya (-) mupepa lyanu lyaakkaunti lyamwezi amwezi ilizwa ku Sosaiti ilijatikizya mamagazini naa mabbuku, eco tacaambi kuti mujisi cikwelete ku Sosaiti, pele iba Sosaiti mbobajisi cikwelete kulindinywe. Bamwi balikubuzya naa ali ongaye mali ngobacaazizye kubbadela akaambo kakutaziba ceeci.

◼ Ibaalu bayeezegwa kubona kwaamba kuti batobela malailile aapedwe mumapeeji 21-3 aa Ngazi Yamulindizi ya April 15, 1991 yamu Chichewa aajatikizya bantu bagwisidwe ibalibonya kuti beempwa bayanda kubweedezegwa.

◼ Makkomitii aa Mulimo aa Mbungano ayelede kutumina mafoomu aategwa Special Needs Room Request aa Miswaangano Yamasi kumutabi kusikila mu September 1.

◼ Aabo boonse babelesya mabbaasi kuswaya mutabi wa Sosaiti uuli ku Makeni, beelede kubazibisya kusaanguna ba Ofesi lya Beteli kwiinda mulugwalo naa kuumya luwaile. Ikweendeenda kwakubona mutabi mbuubede kulacitwa kuzwa mu Muhhulo kuyakusika muli Bwasanu ikutalikila aciindi ca 8:00 hrs kuyakusika aciindi ca 15:00hrs. Kunyina nokweendeendwa kuzwa aciindi ca 15:00 hrs nomuba mu Mujibelo amu Nsondo. Notusika kuofesi lyamutabi kukweendeenda naa kuswaya mweenzuma tweelede lyoonse kusama kabotu. Ikusama zisani zyakusobanina, majini naa masikkipa, naa malukwe mafwaafwi ampato takuzumizigwi. Ikusama kwesu kweelede kakuli kwabulemu, kakuli kokuya ikweelede muntu uuswaya Beteli (ŋanda ya Leza).

◼ Aabo bayanzana ambungano imwi beelede kutumina tupepa twakulembya itupya alimwi atwakwiindulula twa Ngazi Yamulindizi a Awake!, ikubikkilizya atupepa twabo twakulembya kwiinda mumbungano.

◼ Iba Sosaiti tabalanganyi maoda aamabbuku aasikumwaya omwe-omwe. Mulangizi weendelezya weelede kubona kwaamba kuti kwaambilizigwa mwezi amwezi mbungano kaitana tuma oda yamabbuku yamwezi amwezi ku Sosaiti ikutegwa boonse bayanda mabbuku bakonzye kwaambila mukwesu uulanga zyamabbuku. Alimwi mweelede kuti kamwaazi mabbuku aatacitwi coodwe-odwe ccita kuti kuli uyanda.

◼ Imbungano nozicita maoda aamabbuku, icintu citeelede kulubwa lyoonse ncakuti ibeelede kubelesya CD-ROM ya Sosaiti kapati mbaasikumwaya.

◼ Mu “Kabbokesi Kamubuzyo” kamu Mulimo Wesu Wabwami wamu May 1997 kwakaambwa kuti cintu ceelede kucenjelelwa ncamusankwa kubelekaa musimbi, naa musimbi kubelekaa musankwa ngobatakwetene limwi. Kuli twaambo ncotweelede kubelesya maanu mumakani aya. Eci tacaambi kuti balangizi beendeenda naa bakwesu bamwi tabakonzyi kubelekaa bacizi mumulimo wamumuunda. Pele muzeezo wakaambwa ngwakuti tacili camaanu kumukwesu kunoobelekaa mucizi omwe lyoonse kabali buyo bobile ikuti oyo musimbi taakwe ambobacitene limwi naa tabali basazinyina munzila iili yoonse.

◼ Mabbuku aaliko:

Ikaambo Ncomukonzya Kusyoma Ibbaibbele (Kapepa Kamakani No. 13)—Chichewa, Chitonga

Ino Bakamboni ba-Jehova Basyomanzi? (Kapepa Kamakani no. 14)—Cingisi

Ino Bayandwa Bwafwide Bajisi Bulangizi nzi? (Kapepa Kamakani No. 16)—Chichewa, Cingisi

Sena Nyika Eeyi Iyoofutuka? (Kapepa Kamakani No. 19)—Chichewa

◼ Makkaseti Aakuswiilila Aaliko:

Ncinzi Leza Ncayanda Kulindiswe?—Cingisi

◼ Mabbuku Aaboofwu Aaliko:

Luzibo Lutola Kubuumi Butamani—Cingisi

Ncinzi Leza Ncayanda Kulindiswe?—Cingisi