Nkaambo nzi Ncotweelede Kuba Balondo Kumuswaangano Wesu?
1 Mulimo Wesu Wabwami wamu March 1997 wakajisi cibalo cijatikizya bulondo. Mincali 12 kusikila ku 14 yakatuyeezya mbokuyandika kuba balondo kumiswaangano yesu. Nzyeezi ziyeezyo zisyoonto. Amuyeeye kuti kubamba busena bwamuswaangano kuti kabusalala tauli mulimo wacibeela cakusalazya pe, toonse tweelede kubelekela antoomwe.
2 Ibusena Buswaanganinwa bweelede kuti kabutakwe kabala. Kulasolekwa kapati kubamba masena aakuswaanganina akwaasalazya katutanasika. Nokuba boobo, musyule kwali mapenzi aamatombe aasowailwa abasimuswaangano. Kufwumbwa ncotuleta kubusena buswaanganinwa, ceelede kutolwa anze eci cibikkilizya tukwese, mabbodela azimwi-zimwi. Ikuti katukonzya kuzileta kubusena buswaanganinwa nozizwide nkokuti tulakonzya kuzitolelela anozitakwe cintu. Tulakonzya katujisi zisani zisalala, mabbusu alimwi amasyu aaŋaima pele kuti katuzingulukidwe matombe, sena tulibalondo ncobeni?
3 Kumiswaangano imwi, mikwasyi ilida mubusena buswaanganinwa zyakulya zyabo. Eci cili buyo kabotu pele tatweelede kubikka tombe likonzya kucaala kusikila kumamanino aapulogilamu. Bamana kulya cakulya camasikati, mukwasyi omwe-omwe weelede kusalazya matombe oonse ngobabikka. Toonse tweelede kubikkila maanu kumakani aaya. Imikwasyi minji icita mbuli kuti kuli pobwe abusena mpobakkede. Tulabona mabbodela aatajisi cintu, tusinsya, zyakulya zyaloka-loka, tukwese, mapepa aabelesyegwa kucimbuzi naaba mapepa aapulogilamu yamuswaangano kazyaalabene mpobakkede alimwi kababoneka mbuli kuti tabalibwene tombe ndobabikka. Twamana kususula atubone kuti twazibwezelela zyoonse zili munsi lyesu akuzisowa. Mulakonzya kuletelezya kakwese mwalo mukwasyi moukonzya kubikka zyakulya ziloka-loka, tusinsyo alimwi atombe limbi kutegwa zisoogwe muzingungulu naa zilindi zyaasigwa kumuswaangano. Kunyina tombe lyeelede kucaala alimwi oonse mabbodela aazinyugwa aatakwe cintu ayelede kupilusigwa kucibeela cazyakunywa kacitanatalika cibeela cakumazuba. Mwalombwa mutalekeli mabbodela aatakwe cintu mukati kwiile kwaalabana munsi lyanu, alakonzya kuleta ntenda alimwi taakondelezyi pe kulanga.
4 Ikuti kamujisi ŋanda naa cidumba kumuswaangano, amubone kwaamba kuti acilawo aawo mpomukkala kulasalala. Ibana balakonzya kuyiisigwa kukukula akubweza matombe akwaatola kubusena bwakusowela tombe.
5 Ino mbuti kumakani aatubi twabantu? Kumasena amwi aamiswaangano mipati, ipenzi pati kwiinda ndyakusowa tubi. Izimbuzi zilabija cakuti inga takucikonzyeki kuzibelesya. Ibbuku lya Lukkomano Mumukwasyi lyaamba kuti: “Umwi mulawo aakati kayeeyo wakali kujatikizya kusowa tubi twamuntu, twalo twakeelede kuzikka kulaale acilawo kutegwa abusena aakkala bantu atasofwaali. (Deuteronomo 23:12, 13) Oyo mulawo wansiku ulakonzya kugwasya asunu. Noliba sunu bantu balaciswa akufwa nkaambo tabautobeli.” Izimbuzi zyazilindi naa zyakugwejula inga nkozili kuzilawo zyamuswaangano. Kunyina muntu weelede kukkala cikkale-kkale akusiya tubi aatuba. Eci cilaleta malwazi ciindi nokubungene bantu banji abusena busyoonto. Kunze lyaboobo tununka bubyaabi kuli Jehova akubantu. Jehova waamba kuti uyootufwutatila aakubona cintu cuusisya nsoni akati kesu. (Amweezyanisye Deuteronomo 23:14.) Aboobo ncintu ceelede kuti katuli balondo kutegwa bukkale bwesu bweendelane azyeelelo zyakwe. Toonse atusoleke lyoonse kuba balondo munzila yakumubili alimwi akutasofwaazya cilawo cesu kutegwa Jehova ‘ataboni cintu cuusya nsoni mulindiswe.’
6 Tuyanda kuti katulisumpula akaambo kamasena eesu aaswaanganinwa. Kuzwa lino toonse “atulisonzole busofwaazi boonse nibuba bwamubili nibuba bwamoyo, atulondole busalazi bwesu cakuyoowa Leza.” (2 Ba-Korinto 7:1) Atutwiiye tulengwa tubotu twabulondo kumunzi, atuyiisye bana kutola lubazu mukusalazya ŋanda. Atubwiiye bulondo ku Ŋanda ya Bwami alimwi notuswaangana antoomwe mumiswaangano mipati naa misyoonto, kubungana kwesu akube kwakuyaka zyeelelo zisumpukide zya Leza wesu uusalala Jehova.