Ikwiibaluka Lufwu lwa Kristo Nyika Yoonse Mbwiizulwa
1 Jehova watupa zilongezyo zinji. Ibubotu bwakwe boonse alimwi aluzyalo zilaambidwe kabotu-kabotu kuti “[n]cipo cakwe citaambiki!” Ee, ‘iluzyalo lwa Leza’ ndubotu cakuti tatukonzyi kulupandulula pe.—2 Kor. 9:14, 15.
2 Icipego Cakwe Ciinda Kukomena: Imunununi wabantu, Jesu Kristo ncecipego ciinda kukomena ali zyoonse. Ikutegwa atondezye kukomena kwaluyando ndwajisi Jehova kubantu, wakapa Mwanaakwe uuyandwa simuzyalwa alikke. (Joh. 3:16) Icilongezyo caluzyalo cili boobu kuzwa kuli Leza cilayandika kwiibaluka nyika yoonse mbwiizulwa. Ino ceelede kwiibalukwa lili alimwi munzila nzi? Kumangolezya muli Bwane mu April 1, 1999, Ibanakristo munyika yoonse bayooibaluka Mulalilo wa Mwami akusekelela Ciibalusyo cacipaizyo ciinda kukomena.—1 Kor. 11:20, 23-26.
3 Kristo wakatufwida “nitwakacili basizibi” elyo tulakonzya kutondezya kulumba kwiinda mukusekelela Ciibalusyo calufwu lwakwe alimwi akutamba bantu bambi kuti bakajanike aciindi eci ciyandika kapati.—Rom. 5:8.
4 Icintu Ciyandika Kapati: Iciyanza calufwu lwa Kristo citutondezya mbuli mbwaakali kusumpula bulelo bwa Leza cakutalubizya. Alimwi cituyeezya kuti tulakonzya kubaa ciimo cibotu kuli Jehova kwiinda mukusyoma cipaizyo ca Jesu aboobo tulakonzya kusyomezyegwa lufwutuko. (Inc. 4:12) Masimpe, eci ncecintu cipati kwiinda mumwaka!
5 Iluyando ndotujisi kubeenzuma lulatondezyegwa kwiinda mukubatamba kuti bakatusangane ku Mulalilo wa Mwami. Impindu yacinunuzyo ilazumanana kujanwaa zyuulu zili mbozibede zyabaabo ibayiya bubotu bwaco ibwiinda loko kubota. (Flp. 3:8) Abo basyoma cipaizyo ca Kristo balakonzya kubaa bulangizi buyumu bwabuumi butamani.—Joh. 17:3.
6 Iciindi eci ca Ciibalusyo cilatupa coolwe cilibedelede icakuti tutondezye kulumba kuluzyalo lwa Leza ilwiinda kubota. Eci nciindi cibotu kapati icakutola lubazu mumulimo wakukambauka makani mabotu aa Bwami bwa Leza. Impindu zibotu zibikkilidwe baabo boonse ibaciyeeyesya cipego ca Jehova icitaambiki akulibambila kuyoojanika kukusekelela Mulalilo wa Mwami wamwaka uno!