Mumiswaangano Yesu Lyoonse Kakusalala
1 Miswaangano yesu iiminina zina lyamulengi Jehova. Jehova ulabayiisya bantu bakwe kuti kabaandeene abanyika. “Baleelede kwiiyisya bantu bangu kupambukanya zintu zisalalisya azintu zyabuyo akubazibya zintu zisofweede mbozibede azintu zisalala mbozibede.” (Ezk. 44:23) Akaambo kakuti izina lyakwe lilajatikizigwa, Jehova waamba kuti: “boonse, kufumbwa uuambwa muzina lyangu, ngundakalengela bulemu bwangu. Ndime ndakamubumba, ndime ndakamwaanza.’ . . . bantu mbendakalibumbila kuti banditembaule.” (Is. 43:7, 21) Ikaambo ncotuli Bakamboni ba Jehova nkakuti tutembaule Jehova akumuletela bulemu. Tulacita obo notuli kumiswaangano kwiinda mubukkale bwesu, amuŋambawido yesu, amunsamino alimwi anotubamba busena mpotukombela kuti kabusalala lyoonse.
2 Icilawo ceelede kacisalala. Tubeleka canguzu kubamba zilawo zyamiswaangano alimwi akuzisalazya katutanasika. Twabona lusumpuko kapati mumiswaangano imwi myaka misyoonto eyi yainda. Nokuba boobo, akaambo kabapya balimukutusangana, kuyandika kuzumanana kuyiisya. Kufwumbwa cintu ncotuleta mucilawo acigwisigwe kubikkilizya atukwese tutajisi cintu, amabbodela azimwi-zimwi. Ikuti katukonzya kuziletelela mucilawo nozizwide caamba kuti tulakonzya kuzitola nozitakwe cintu. Tulakonzya katusamide zisani zisalala, amabbusu aaŋaima alimwi abusyu, pele kuti katuzingulukidwe tombe sena inga twati tulasalala?
3 Mumiswaangano imwi imikwasyi ilida muzilawo zyamiswaangano zilyo zyabo. Eeci ncibotu pele tatweelede kusiya tombe kaliliko mane kusikila kumamanino aapulogilamu. Notwamana kukoboka imukwasyi umwi aumwi weelede kugwisya tombe ndyobabikka. Kutabi mabbodela aatakwe cintu, atusinsyo, abunkumu-nkumu bwazyakulya, atukwese, amapepa aakucimbuzi amapepa aakulembela alimwi amapepa aapulogilamu izyaalabene aansi iciindi pulogilamu yakumazuba noitalika. Notwamana kukoboka atuzibwezelele zyoonse zyaalabene mumbali lyesu akuzisowa. Inga cagwasya kuti mwaletelela akakwese mukwasyi mounoobikkila bunkumu-nkumu bwacakulya, atusinsyo atombe lili lyoonse ilyeelede kusowela muzingungulu naa muzilindi zyakusowela tombe izisidwe abusena bwamuswaangano. Twamulomba kuti mutasiyi mabbodela kaalabene aansi mumbali lyanu naajisi cintu naatajisi, alakonzya kuleta ntenda alimwi eci citondezya buyamba.
4 Ikuti naa katujisi kaanda naa kadumba kumuswaangano atubone kwaamba kuti cilawo mpotukkede cilasalala. Ibana balakonzya kuyiisigwa kukukula alimwi akuyola tombe kulitola kubusena mbotwabambilwa kuti katusowela.
5 Ino mbuti zimbuzi? Muzilawo zimwi zyamiswaangano, ipenzi pati liliko nzimbuzi. Izimbuzi zilasofwaala cakuti inga tazicikonzyi akubelesegwa pe. Ibbuku lya Lukkomano Mumukwasyi lyaamba kuti: “Myaka ili 3,500 yainda, Leza wakapa musyobo wa Israyeli Mulawo wakwe kutegwa weendelezye bukombi bwabo abuumi bwabo bwabuzuba abuzuba. Oyo Mulawo wakagwasya kukwabilila musyobo oyu kumalwazi kwiinda mumilawo yabulondo yakabikkwa. Umwi mulawo akati kayeeyo wakali kujatikizya kusowa tubi twamuntu, twalo twakeelede kuzikka kulaale acilawo kutegwa abusena aakkala bantu atasofwaali. (Amubale Deutronomo 23:12, 13.) Oyu mulawo wansiku ulagwasya asunu. Noliba sunu bantu balaciswa akufwa nkaambo tabautobeli. Izimbuzi, zibe zyakusya naa zyamaanzi zilajanika kucilawo camuswaangano. Taakwe muntu weelede kulivwunina aanze akusiya tubi twakwe aantangalala pe. Ibanyama mbobacita obo pele Leza watulailila kuti tutabi mbuli mbabo. Itubi tuletela malwazi alimwi tulanunka, kunze lyaboobo tulamusuluzya Jehova alimwi abantu balasululwa. Jehova waamba kuti ulatufwutatila kuti naa wabona cintu cimwi cisuluzya akati kesu. (Amweezyanisye Deuteronomo 23:14.) Aboobo atube bantu basalala lyoonse kutegwa bukkale bwesu bweendelane azyeelelo zyakwe. Toonse atusole kuba bantu basalala lyoonse alimwi cilawo cesu ceelede kacitasofweede kutegwa Jehova “ataboni cintu neciba comwe cuusya insoni.”
6 Ikuti katulaa luyando kubakwesu cilatupa kuti tubayeeye. “Luyandisyo . . . talukwe cisapi, talulilangilili cintu.” (1 Kor. 13:4, 5) Ncisapi ikusiya tombe abusena mpotukkede nkaambo kuli bantu bamwi ibakkele mumbali lyesu. Ncisapi ikusiya zimbuzi kazisofweede nkaambo kuli bamwi ibatizibelesye. Aboobo atutondezye luyando kubeenzuma, elyo “Kuliceeci bantu BOONSE bayoomuziba, kuti muli basikwiiya bangu, mwanooyandana umwi amweenzinyina.”—Joh. 13:35.
7 Tulikkomene amasena eesu motukombela, elyo tulalumbaizigwa akaambo kakuti tulimukucita kabotu mumbazu ezi. Toonse atuzumanane “tulisonzole busofwaazi boonse nibuba bwamubili nibuba bwamoyo, atulondole busalazi bwesu cakuyoowa Leza.” (2 Kor. 7:1) Amwiiye ziyanza zyabulondo kuŋanda nkomuzwa alimwi amubayiisye bana kugwasilizya kuti munzi kuusalala. Atwiiye bulondo ku Maanda eesu aa Bwami, elyo camamanino notuswaangana mumiswaangano mipati naa miniini imbungano zyesu azitobele bukkale busumpukide bwa Leza wesu Uusalala Jehova. “Nkaambo mudima ulavumba nyika, akumisyobo yoonse kulasia mbi, pele kulinduwe Jehova wapasula, abulemu bwakwe bulaboneka nkobede.”—Is. 60:2.