Tulikkomene Akuvwula Kwakacitwa

Kumamanino aamwaka wesu wamulimo mu Zambia twakabaa mweelwe mupya wabasikumwaya ibasika ku 107, 233 ibakacita lipooti. Eeci caamba kuti mweelwe wakayungizigwaa 5 pasenti kweelana amweelwe wamwakali mu August 1998—calo icitupa kukkomana cini-cini! Lino sikumwaya omwe-omwe ujisi bantu bali 96 bakukambaukila. Ibali 7,654 bakabbapatizigwa mumwaka wamulimo ooyu wainda. Ooyu ngomweelwe mupati kwiinda kuzwa mumwaka wa 1970. Mweelwe waatala mupya waziiyo zya Bbaibbele wakasika ku 138, 281. Tulapaila kuli Jehova kuti alongezye milimo yesu mukukambauka Bwami bwakwe.

Ibaalu abakutausi kubikkilizya abasikumwaya boonse bakulwaizigwa kuti bayeeyesye milimo njotwakacita kutegwa tusike ambaakani eeyi. Basikumwaya ibainda ku 100,000 bali kale andiswe mumbungano zyesu. Alimwi banji baciboola mwezi amwezi twazumanana ikucita kabotu mumulimo wesu wakukambauka. Nokuba boobo, kulibambila kabotu kuya mumulimo wamumuunda kubikkilizya akugwasya bamwi mpobayandika lugwasyo kulayandika kapati kutegwa mulimo wesu uyaambele. Tusyoma Jehova kuti atulongezye kucita kuti tuzumanane kuyaambele.—1 Kor. 3:7.

Ikuti baalu abakutausi ikapati aabo basololela Ciiyo Cabbuku Cambungano antoomwe abasikumwaya bamwi basimide alimwi abapainiya kabazumanana kubeleka canguzu mbuli mbobakacita mumwezi wa August, icilongezyo ca Jehova cilatondezegwa kwiinda mukuzumanana ikuvwula kwabasikumwaya. Zimwi ziindi kuyandika buyo kubayeezya caluyando bakwesu kuti kabatola lubazu mumulimo wakukambauka alimwi akubayeezya kuti batole lipooti yabo yamumuunda. Imalailile akapegwa mu Mulimo Wesu Wabwami wa November 1998 mupepa lyamukati mucibalo cakuti “Amuzwidilile Mumulimo Wanu,” ayelede kutugwasya kusumpula mulimo wesu akujana lukkomano lunji mukuzwidilila nkotubaankuko kwiinda mumilimo yesu.