Mbotunga Twacikonzya Kubandikaa Bantu
1 Bupanduluzi bumwi bwabbala lyakuti “kubandika” “nkwaambaula amuntu kumukulwizya kucita cimwi cintu naa kucinca mizeezo njaajisi.” Ikutegwa muzumanane kuzwidilila mumulimo, mweelede kucikonzya kabotu-kabotu kubandika abantu mbomujana. (Inc. 17:2-4) Pele ino mbuti mbomunga mwalujana luzibo olu?
2 Ikusaanguna Kuyandika Kuzinzibala Kuyeeya: Nomubala kasimpe kamu Bbaibbele ciyoomugwasya ikuti naa mwaciyeeyesya cibalo ncomubala. Ikuti zibeela zimwi mucibalo kazili ziyumu kuteelela, amuvwuntauzye kujatikizya zibalo eezyo akuzinzibala kuyeeya abwiinguzi mbomwajana. Amusole kutumvwisya twaambo twapegwa alimwi atwaambo twamu Magwalo tuli moomo mwajanika bupanduluzi oobo.
3 Ikulibambila Mulimo Wamumuunda Kulijatikizyidwe: Amuyeeye mbomunga mwabapandulwida kasimpe bantu basiyene-siyene. Amube amubuzyo uubapa kuyeeya akubakomanisya bantu. Amubone mbomunga mwabikkilizyaa kaambo kamu Magwalo ambomukonzya kukabandikaa muntu. Amuyeeyele twaambo tulangilwa kuti inga twabuzigwa alimwi ambomunga mwatwiingula. Amusale kaambo mubbuku naa mumagazini iimwaigwa kalo nkomubona kuti inga kabeleka kabotu.
4 Amwiiye Cikozyanyo ca Jesu: Jesu wakasiya cikozyanyo cibotu cambokubandikwa twaambo cakuzwidilila kuzwa mu Magwalo. Ikutegwa tubone mbwakali kuyiisya, atulange-lange makani aali kuli Luka 10:25-37. Nzila yakutobela njeeyi: (1) Amubelesye Magwalo nomwiingula mibuzyo yabantu. (2) Amubalombe kuti baambe mbobalimvwa alimwi amubalumbaizye nobaamba zintu zimvwika. (3) Amubone kuti Magwalo aleendelana amubuzyo wabuzigwa. (4) Amubelesye cikozyanyo cilaasinizye kuti kaambo kayiingulwa kamvwugwa kabotu-kabotu.—Amubone Ngazi Yamulindizi yamu Chichewa yamu August 15, 1986, amapeeji 27-8, mincali 8-10.
5 Cibelesyo Ncotwakapegwa Amucibelesye: Bbuku lya Kukambitsirana za M’malemba lyakabambilwa kuti katulibelesya ciindi coonse mumuunda. Ntalisyo yamibandi iili mumo, abwiinguzi kumajwi atyompya mibandi alimwi atwaambo twakubandika tulatugwasya kapati ikuziba mbotunga twabandika abantu. Ibbuku lya Kukambitsirana ncibelesyo cibotu kapati ncotweelede kubelesya lyoonse ciindi notuli mumulimo alimwi tuteenkeenki kulibelesya mumibandi ya Bbaibbele. Amwiinduluke twaambo tuli amapeeji 7-8 mubbuku eli akubona mbolikonzya kubelesyegwa kabotu.
6 Kucizyiba kubandika kuyooyungizya buhaazibwene bwanu mumulimo wakukambauka alimwi akuyiisya. Eci ciyoomugwasya kapati nywebo lwanu alimwi abaabo mbomujana mumulimo.