Ikubotelwa Mumulimo Uusetekene Ngomucita
1 Bakapiluka “akubotelwa.” Ibbaibbele lyaamba mbobakalimvwa basikwiiya bali 70 eelyo nobakapiluka kuzikwaambila Jesu mbobakeenda mulweendo lwabo lulamfwu lwakukambauka. Bakabotelwa mumyoyo yabo akaambo kakuti bakacita kuyanda kwa Leza. (Lk. 10:17) Ncinzi cikonzya kumugwasya andinywe kubotelwa mumulimo ooyu uusetekene?
2 Amube Alusyomo: Mulaa coolwe cipati ncomwakapegwaa Leza cakuzibya bantu makanze mapati aa Jehova. Kwiinda mukukambauka kwanu, mulakonzya kugwasya muntu kuleka micito yanyika mibyaabi alimwi akumwaangununa kuzwa kubukombi bwakubeja. Mulakonzya kupa bantu bulangizi bwabuumi munyika iitakwe manyongwe aaliko sunu. Amuyeeye buyo mbocimukkomanisya Jehova eelyo nomusyanga mbuto zyakasimpe mumyoyo yabantu bayanda kumvwa. Amusungwaale eelyo nomupailila muuya wa Leza kuti umugwasye kujana lukkomano mumulimo ngomucita camoyo woonse.
3 Lwiiyo Lugwasya: Ilwiiyo ndwaakapa Jesu kuli basikwiiya bakwe ibali 70, lweezyanisigwaa Muswaangano Wamulimo ngotulaawo sunu. Wakabayiisya kutegwa bacikonzye kuzuzikizya mulimo wabo cakumaninina. (Lk. 10:1-16) Sunu Muswaangano Wamulimo utuyiisya nzila mbotukonzya kubasikila bantu, mbotunga twatalisya mubandi alimwi ambotukonzya kutalisya alimwi akweendelezya ziiyo zya Bbaibbele zyaaŋanda. Kwiinda mukusola canguzu kusumpula luzibo lwanu mukukambauka, muyoojana kuti kuyoowa kuli koonse naa ikutaciziba kabotu kulakonzya kumana akumuletela lusyomo alimwi alukkomano.
4 Amubikkile Maanu Kuzintu Zili Kumbele: Nokuba kuti wakayandika kuliyumya mumakatazyo manji, Jesu wakalikkomene mumulimo wakwe uusetekene. Nkaambo nzi? Nkaambo wakali pakamene akubikkila maanu azilongezyo alimwi azyoolwe nzyaakabikkilidwe kumbele. (Heb. 12:2) Andinywe mulakonzya kucita mbubwenya kamubikkide maanu alimwi amoyo wanu muzina lya Jehova alimwi azilongezyo ziyoobako munyika ya Leza mpya. Mwacita boobo muyookkomana alimwi muyoobona kuti mulimo wanu ulaampindu.
5 Ikubeleka mulimo uusetekene wa Jehova ncoolwe cipati kapati ncomweelede kukkomanina sunu. Aboobo lyoonse kamwaamba kuti: “Ndakondwa kucita luyando lwako, O Leza wangu.”—Int. 40:8.