Iluyando Ndolutukulwaizya Kukambauka
1 Mbotuli Bakamboni ba Jehova, bunji bwabantu balituzyi kuti tuli bakambausi bamakani mabotu aa Bwami ibasungweede. (Mt. 24:14) Ibantu bainda kutuulunzuma tuli cisambomwi nyika yoonse mboyizulwa balisungweede; ibapya balabikkilizigwa eelyo nobatusangana mukukambauka. Myeelwe ilalembwa kweelana abaabo batola lubazu mumulimo ooyu.
2 Ino ncinzi citukulwaizya kuti tulyaabe kutola lubazu mumulimo oyu muyumu? Tatusinikizigwi buya pe, nokuba koongelezegwaa buvwubi naa kuyandisya kupegwa bulemu bulibedelede. Kumatalikilo, ibunji bwesu twakali kuyoowa akulimvwa kuti tatweeleli alimwi bunji bwaziindi bantu kunyina nobakali kututeelela pe. (Mt. 24:9) Ibunji bwabasikulangilila buyo balakatazyigwa kuteelela icitukulwaizya. Aboobo kweelede kuba kaambo katukulwaizya kuti tuliyumye.
3 Inguzu Zyaluyando: Jesu wakatondezya mulawo mupati kwiinda yoonse naakaamba kuti tuleelede ‘kuyandisya Jehova amyoyo yesu yoonse, muuya, kuyeeya alimwi anguzu.’ (Mk. 12:30) Iluyando lwesu kuli Jehova luyeeme aakulumba kupati nkotujisi akaambo kabulemu abube bwakwe mbwaanga Mmweendelezi Mupati, Mmulengi wazintu zyoonse, walo ‘uuyelede kutambula bulemu, lulemeko alimwi anguzu.’ (Ciy. 4:11) Ibube bwakwe bugambya tabukonzyi kweelanisigwaa cintu cimbi.—Kul. 34:6, 7.
4 Kuziba Jehova alimwi akumuyanda kutukulwaizya kumunika mumuni wesu kumbele lyabantu. (Mt. 5:16) Mumuni wesu ulamunika eelyo notumutembaula kubuleya, notubandika kujatikizya milimo yakwe iigambya alimwi akumwaya mulumbe uujatikizya Bwami bwakwe. Mbubonya mbuli angelo uuli mujulu naa mumulengalenga, tulijisi ‘makani mabotu aateeli aakukambaukila . . . bamasi boonse amisyobo yoonse amyaambo yoonse amikowa yoonse.’ (Ciy. 14:6) Iluyando ndotujisi nenguzu zili mukupa kuti mulimo wabukambausi wanyika yoonse ucitwe.
5 Ibantu bakunyika babona mulimo wesu wabukambausi kuti “mbufubafuba buyo” buteelede kuswiililwa. (1 Kor. 1:18) Kwacitwa bubambe bunji bwakusola ikulesya mulimo wesu. Iluyando lwesu lusyomeka lwatuyumya kuti twaambilizye, mbubonya mbubakacita baapostolo kuti: “Tatukonzyi swebo kutaamba nzotwakabona akumvwa. . . . Tuleelede kumvwa Leza kwiinda bantu.” (Inc. 4:20; 5:29) Mulimo wabukambausi watolelela kuyaambele kumabazu aanyika oonse nokuba kuti kuli kukazyigwa.
6 Iluyando ndotujisi kuli Jehova luli mbuli mulilo uuyakisya uutukulwaizya kwaambilizya koonse-koonse kujatikizya milimo yakwe iitembaulika. (Jer. 20:9; 1 Pet. 2:9) Aboobo, tulatolelela “[kuzibya] bantu milimo yakwe . . . nkaambo wacita milimo iibotezya”!—Is. 12:4, 5.