Amupe Bukamboni Kwiinda Mukuba Simukobonyina Mubotu
1 Jesu wakaamba kuti “yanda mweenzinyoko mbuli mboliyanda omwini.” (Mt. 22:39) Cakutadooneka, ‘mulabacitila milimo mibotu’ basyominyoko, pele sena mulakonzya kuyungizya luyando lwanu kubantu aabo mbomukkala limwi munsi-munsi ? (Gal. 6:10) Munzila nzi?
2 Kwiinda Mukulizyibya Nobeni: Sena basimukobonyoko balimuzyi kuti muli Bakamboni? Ikuti kabatamuzyi, ino mulekela nzi kubaswaya ciindi nomuli mumulimo wamumuunda? Zitiikatobele zilakonzya kumugambya! Ikuti naa kacitali ciyumu kulindinywe, amusole kupa bukamboni kuli mbabo kwiinda mukwiizya. Ciindi nomulaanze, mulakonzya kubabona kababeleka mulubuwa lwabo naa kabeendeenda mumugwagwa. Amubasikile cakuseka-seka. Amusoleke kubaambila kujatikizya nzyomusyoma, nkoijanwa Ŋanda ya Bwami, azicitika ooko alimwi amubazibye naa kuli bamwi basimukobonyoko ibajanika kumiswaangano. Amubatambe kuti abalo kabajanika kumiswaangano. Amukanze kupa bukamboni bubotu kujatikizya makani mabotu kumuntu uuli oonse ngomuzyi.—Inc. 10:42; 28:23.
3 Kwiinda Mubukkale Bwanu Bubotu: Ibukkale bwanu bwabulongwe bubaambila zintu zinji bantu kujatikizya ndinywe alimwi bulakonzya kumupa coolwe cakupa bukamboni. Alimwi bupa kuti bantu ‘balemeke luyiisyo lwa Leza.’ (Tit. 2:7, 10) Amubabikkile ncobeni maanu basimukobonyoko. Amube balongwe alimwi amubamvwide luse bamwi. Mutanikubanyonganyi eelyo nobayanda kuti babe balikke alimwi akutasabila bantu mucilawo momukkala. Ciindi umwi wabo naaciswa, amubabikkile maanu akulisungula kubagwasya. Ciindi mukwasyi mupya nowalongela kubusena nkomukkala, amubatambule kwiinda mukubaswaya. Micito eeyi yaluyando iyoopa kuti bamulange munzila mbotu alimwi ilamukkomanisya Jehova.—Heb. 13:16.
4 Kwiinda Mbuli Mboziboneka Zintu Nzyomujisi: Ikuba simukobonyina mubotu kubikkilizya kulanganya ŋanda yanu kutegwa kayisalala. Ikuti naa ŋanda alubuwa kazisalala alimwi akweebeka zilapa bukamboni bubotu. Pele ŋanda ilaatombe naa iijisi mafwuse aalabene mulubuwa, ncobeni iyoosampaula mulumbe wa Bwami. Aboobo, cilayandika kapati ikubamba ŋanda, lubuwa alimwi amyootokala yanu kuti kiisalala alimwi kiili muciimo cili kabotu.
5 Ikubabikkila maanu aabo ibali kunze ambungano ya Bunakristo, kutondezya luyando kuli basimukobonyoko. Ino ncinzi cikonzya kutobela akaambo kaceeci? Ibamwi balakonzya ‘kulemeka Leza akaambo kakulangilila milimo yanu mibotu.’—1 Pet. 2:12