“Muleelede Kusalala”
1 ‘Kusalalisya nkukwa Jehova.’ Aaya mabala aayoosya akalembwa kutegwa boonse baabone, kaalembedwe ampande yangolida iisalala yaangidwe alukole lwamwemvwe acitambala cakali kusamwaa mupaizi mupati mu Israyeli. (Kul. 28: 36-38) Eeci cakali ciyeezyo cibekema kutondezya kuti ikwiimpanaa bamasi bakali kukomba baleza batasalali, balo bana Israyeli bakali kukomba Leza wabulondo alimwi uusalala.
2 Imulawo Leza ngwaakapa Musa wakajisi zintu zyakali kuyandika kapati kutegwa abone kuti bantu bakwe balalisalazya kumubili alimwi akumuuya. Eeci ncecakapa kuti bana Israyeli baandaane kauli musyobo uusalala. Bukkale oobu bwakusalala bwakaleta bulemu kuli Leza alimwi akugwasya musyobo ooyu kubaa buumi bubotu.—Lev. 11:35, 36; 15:1-11; Is. 52:11.
3 Jehova ulangila baabo bamukomba sunu kuyeeya mbubonya mbuli nguwe kumakani abulondo. Imwaapostolo Petro wakasololelwa muuya kuti alembe kuti: “Mbubuli mbwasalala ooyo wakamwiita, anywebo mbubonya mube boobo. Kayi Malembe alati, ‘Muleelede kusalala, nkaambo mebo ndasalala.’” (1 Pita 1:15, 16, Ci) Ino caamba nzi kuba basalala? Mu Bbaibbele cipa muzeezo wakuba muntu ‘uumweka, mupya, uusumbula alimwi mulondo.’ Musa wakapandulula Jehova kuti nguuyinda kuba mubulondo, uutajisi kampenda, uutazumizyi buyamba.—Hab. 1:13.
4 Bulondo ncitondezyo cizibya bantu ba Jehova. Ibantu basalala nobamukomba, Jehova ulalemekwa. Sena Leza walo uutazumizyi buyamba inga wabuzumina bukombi bwabantu balaa tombe? Tatukonzyi kumutoongooka Leza akaambo kakutazumizya bantu bayamba kubaa buumi muparadaiso iiboola iisalala alimwi yeebeka, embo na? Bayakwiile kwiisofwaazya, alimwi eeco Leza ncatayandi. Leza mulondo alimwi ulasalala, uzumina buyo bukombi bwabantu balondo alimwi basalala! Amuyeeye mbwaakaamba kuti: “Muleelede kusalala, nkaambo mebo ndasalala.”
5 Imibili yabulondo, zyakusama, maanda alimwi amyuunda nzibeela zyabukombi bwesu. Kakunyinaa kuya kulafwu, zilapa bumboni. Ziletwa akaambo kakusama buntu bupya. (Kol. 3:9, 10) Cilalangilwa buya kuti bantu balondo bayoobaa maanda abulondo alibonya kabotu alimwi amasena aabo aakukombela kubikkilizyaa masena akucitila miswaangano mipati aabulondo. Kutegwa eeci cikonzeke, mukombi umwi aumwi weelede kuti kapakamene lyoonse kuba mulondo. Ikuti katutali boobu, Jehova waamba kuti ‘uyootufwutatila.’—Dt. 23:14.
6 Ikuba Balondo Kumiswaangano Yesu: Mumabbuwa musobaninwa zisobano alimwi azilawo nzyotuswaanganina nzyotubbadelela kutegwa tubelesye, ibakwesu kanjikanji balabeleka canguzu kutegwa basalazye busena kwiinda mukugusya tombe lisiya bantu bakunyika balo basowayila buyo ansi. Tabakwe makani ambuli busena mbobulibonya kusofwaala alimwi tababikkili maanu aakuti muntu umwi weelede kusalazya busena kwiinda mukugusya tombe ndyobasiya. Sena inga twalangila bakombi ba Jehova kulilemeka munzila eyi? Imubuzyo ulaingulwa mubbuku lya Malaki 3:18, kweelena Bbaibbele lyamu 1996 [BT] lyaamba kuti: “Alimwi muyoobona lwaandaano . . . aakati kabaabo babelekela Leza abaabo batamubelekeli.” Kuleelede kuba kwaandaana, ikwiimpana kweelede kulibonya buya caantangalala kuli baabo balangilila. Ikuba balondo mbubwenya mbuli Jehova kulatwaandaanya. Ncibeela cabukombi bwesu.
7 Notusikaa busena bucitilwa muswaangano tatulangili kujana tombe, mapepa, tukwese naa tupepa twatupulasitiki, tusinsyo twamabbodela alimwi atombe limwi lyaalabene ansi, embo na? Nkaambo nzi? Nkaambo kakuti tulakkomana kapati kubaa masena akucitila miswaangano aasalala. Imbungano zilasalazya masena aakuswaanganina katutanaa kusika, alimwi tulalumba kapati akaambo kaceeci. Toonse tulakonzya kutola lubazu mukubamba masena aya kuti kaasalala kwiinda mukubwezelela tombe ndyotulosya alimwi akuyiisya bana besu kutasowa cisowe-sowe tombe ansi. Takweelede buya kubaa bakwesu bana-bana kuyaabweendeenda kutegwa kababwezelela tombe ndyotusowa mumasena acitilwa miswaangano. Umwi aumwi uleelede kunyampula mukuli wakwe mwini alimwi akukkomana kuba abusena bwakucitila muswaangano butakwe kabala katombe ibulemya Jehova Leza wesu sibulondo. Cibeela cilanga bulondo ceelede kubona kuti kuli zingungulu zinji, tukwese naa zilindi mwakuti bakwesu kabasowela tombe. Mabbodela aatakwe cintu mukati taayelede kusiya kaalabene aansi. Ikuti naa mwaula cakunywa kumuswaangano, ayelede kupilusigwa nkumwaajana. Amusyomezye lwanu alimwi amukwasyi wanu kuti tamukabi basikusowa tombe, kube kuŋanda, mumugwagwa, alimwi kwaambisya ku Ŋanda ya Bwami naa abusena acitilwa muswaangano. Ikuti katuyanda kuzuminwaa Jehova, tweelede kuba balondo ciindi coonse.
8 Kulibaabo bajisi kaanda naa kadumba kumuswaangano, amubone kwaamba kuti acilawo mpomukkede alasalala. Tombe lyeelede kusowelwa kubusena bwakabambwaa basikweendelezya muswaangano. Kwiinda mukucita boobu, mukwasyi woonse ulakonzya kutola lubazu mukulemeka Jehova.
9 Ipenzi lijanika kuzilawo zimwi zyamiswaangano nzimbuzi. Izimbuzi zilasofwaala cakuti inga tazicikonzyi akubelesegwa pe. Kunyina akati kesu uuyanda kubelesya cimbuzi cisofweede. Boonse beelede kutola lubazu mukubamba zimbuzi kuti kazisalala. Ibapati beelede kubasindikila bana alimwi akusalazya bamana kubelesya. Ibacibeela cilanga bulondo beelede kubona kuti kuli zipyaango kutegwa kakusalazigwa mumbali atulindi twazimbuzi. Tweelede kusamba kumaanza twamana kubelesya cimbuzi. Cilakatazya kapati kukaka kujatana mumaanza nomwaanzyanyaa muntu ngomuzyi kuti tanaasamba mumaanza naamana kubelesye cimbuzi. Milyango yoonse yazimbuzi yeelede kuba azijazyo kutegwa kakujalwa kutondezye bulemu kuli baabo bali mukubelesya. Itwe naa mulota (Lime) antela musenga zyeelede kazili afwaafwi kutegwa zibelesegwe. Ibakwesu alimwi abacizi basyomeka balakonzya kubikwa kutegwa kabalanga busalazi bwazimbuzi. Ceelede kutukkomanisya kubamba masena aya atabikkilwi maanu kanjikanji, pele ceelede kuti kacili ncecibeela ciyandika kapati camuswaangano kuti kacisalala, ‘kucitila bamwi mbubonya mbotuyanda kuti batucitile.’ Taakwe muntu weelede kulivwunina aanze akusiya tubi twakwe aantangalala pe. Ooku nkulubizya kuli Jehova akubakwesu alimwi cilakonzya kuleta malwazi alimwi alufwu.—Amubale Deuteronomo 23:12-14.
10 Imalailile aya ncibeela calwiiyo lwabuponi munyika mpya alimwi ngaayandika kulibaabo boonse bakomba Jehova. Wakaamba kuti, “Baleelede kwiiyisya bantu bangu kupambukanya zintu zisalalisya azintu zyabuyo akubazibya zintu zisofweede mbozibede azintu zisalala mbozibede.”—Ezk. 44:23.
11 Ibantu bayanda kubotezya Leza balasoleka canguzu kupona kweelena zyeelelo zya Mulengi zyakusalala. Eeci cilakonzya kwaamba kuti tube akucinca mumizeezo yesu kujatikizya bulondo bweelede kucitwa. Ibunji bwesu tuli mukucita kabotu munzila eyi alimwi akubona mpindu zijanika mukuba balondo. Aboobo mweelede kulumbwa. Atuzumanane kubaa cilengwa cabulondo kuŋanda alimwi akuyiisya bana besu kutola lubazu mukwiibamba ŋanda cabulondo. Aboobo ibulondo ku Ŋanda ya Bwami alimwi akumiswaangano mipati cinooli cintu calyoonse, nkaambo ciyooba ciyanza cesu buya alimwi anzila yesu yabuponi bwa Bunakristo. Toonse tweelede kuyanda kuba balondo. Nkaambo nzi? Nkaambo tuyanda kuba basalali mbubwenya mbuli Leza ngotukomba.