Muli ‘Ceebelo Kumeso Aazilenge’!
1 Imwaapostolo Paulo wakalemba kuti: ‘Twaba ceebelo kumeso aazilenge zyoonse, nibaba baangelo nibaba bantu.’ (1 Kor. 4:9) Ino eeci caamba nzi alimwi ceelede kutujatikizya buti sunu mumulimo wesu?
2 Kumuna Korinto, ikwaamba kuti ‘ceebelo kumeso aazilenge’ kulangilwa kuti kwakali kuyeezya mamanino aazisobano zyabana Roma zyakutila bulowa mwalo basikuzundwa mobakali kwiimikwa kumbele lyazyuulu zyabantu basikulangilila kabatanajaigwa calunya. Mbubwenya buyo, basikulangilila banji, bantu alimwi abangelo, bakabona kupenzegwa kwalo Banakristo bamumwaanda wamyaka wakusaanguna nkobakacitikilwa akaambo kakupa bumboni kujatikizya Bwami. (Heb. 10:32, 33) Kusyomeka kwabo kwakabajatikizya basikulangilila banji, mbubwenya mbuli kukakatila kwesu mumulimo mazubaano. Ino nkuuli bani nkotuli ceebelo?
3 Kubantu Bakunyika: Zimwi ziindi muli sikapepele kulamwaigwa twaambo tujatikizya mulimo wabantu ba Jehova. Nokuba kuti tulaakkomanina malipooti mabotu alimwi aabwini kujatikizya mulimo wesu, tulalangila akumwaigwa kwamakani mabyaabi kucitwa abaabo batukazya ciindi aciindi. Nokuba boobo, tweelede kuzumanana kutondezya kuti tuli basimilimo beni-beni ba-Leza “kuciindi campuwo imbi nikuba kuciindi campuwo imbotu.” (2 Kor. 6:4, 8) Kuli basikulangilila babombe myoyo cilalibonya caantangalala kuti tuli basikwiiya bakasimpe ba Jesu Kristo.
4 Kubangelo: Azyalo zilenge zyamuuya zilatulangilila. Diabolosi abangelo bakwe balalangilila, pele ‘cabukali bupati,’ kabayandaula kulesya mulimo wakupa “bumboni bwa-Jesu Kristo.” (Ciy. 12:9, 12, 17) Bangelo ba Leza basyomeka balalangilila alimwi akukkomana noliba leelyo sizibi omwe neempwa. (Lk. 15:10) Ceelede kutukulwaizya kuziba kuti, ibangelo babona mulimo wesu kuba uubindeene alimwi uuyandika kapati uuli mukucitwa munyika sunu!—Ciy. 14:6, 7.
5 Ciindi nomwakazigwa naa kuyeeya kuti mulimo wanu tauzyali micelo mibotu, amuyeeye kuti kaambo kapati kajatikizya bubumbo boonse kayeeme alindinywe. Ikukakatila kwanu cakusyomeka kuyubununa zinji kujatikizya lusyomo lwanu. Kumamanino, ‘lumamba lwanu lubotu lwalusyomo’ luyoomugwasya “[ku]jatisya buumi butagoli.”—1 Tim. 6:12.