Kucizyiba Kubala Alimwi Akulemba Kuli Akati Kabantu ba Leza

¹ Kumazubaa nsiku, kwakali mweelwe mupati wabantu ba Leza ibakacizyi kubala alimwi akulemba. Musa, Joshua, Bami ba Israyeli, Jesu alimwi abaapostolo bakwe bakalicizyi kubala alimwi akulemba. Ibanji sunu bazyiba kuti, ikucizyiba kubala alimwi akulemba kujalula nzila yakutola lubazu mukukomba Leza.—2 Mak. 34:14; Jos. 1:8; Dt. 17:18, 19.

² Ibungano iimwi aimwi ikulwaizyigwa kucita bubambe bwacikolo cabapati camuzwenge kwiinda mukubelesya kabbuku kamalailile kakapegwaa muzike musyomesi uucenjede. Inga cagwasya ikuti kamwaayobola mazina abaabo batalovwi alimwi adeeti nobakatalika cikolo. Ofesi lyamutabi naa mulangizi weendeenda ulakonzya kubuzya kujatikizya cikolo cicitwa mumbungano yanu.

³ Jehova Leza wakabapa bantu maano aakonzya kubapa kucizyiba kubala alimwi akulemba. Nokuba boobo, oobu busongo naa nguzu eezyi tazikonzyi kwiile kuliboolela kakunyina kusolekesya buya. Ino mbulumbu nzi bujanwa kwiinda mukwiiya kubala alimwi akulemba? Ikutegwa katucikonzya kumvwisya Ijwi lya Leza alimwi akumvwida malailile aakwe: “[tu]leelede kubika miyeeyo . . . kulindilyo lyoonse buyo, isikati amasiku.”—Jos. 1:8.

(1) Amumukulwaizye sicikolo wanu. Amukankaizye kwaamba bubotu bujanwa mukwiiya kubala alimwi akulemba. Amumugwasye sicikolo wanu kubaa makanze aayelede.

(2) Amubikke ziindi zinji zyakwiiya mumvwiki amvwiki. Amubape ciiyo cakuyakucitila kuŋanda mwamaniizya cibeela cimwi cipedwe.

(3) Ziiyo zyakubala zyeelede kuti kazili zyuuba-uba alimwi zifwaafwi—Mutabavwuzizyi zyakwiiya basicikolo banu.

(4) Kamubayumya-yumya alimwi akuba bantu bakkomana kujatikizya kuyaampela kuli koonse nkobacita.

(5) Amumugwasye sicikolo umwi aumwi kuzibelesya eezyo zyayiya abuzuba.

(6) Kamuyiisya ziyandika—Ibapati balibbaatidwe kaka!

(7) Kamubapa bulemu basicikolo banu—Mutani kubafwubaazyi pe.

(8) Mweelede kuti kamwaazi mapenzi asicikolo omwe-omwe—Kutabona kabotu naa kutamvwa kabotu kwaasicikolo wakomena kulakonzya kumupa kutacita kabotu kumatalikilo.

(9) Sicikolo weelede kwiiya mabala antalisyo, imabala mbuli A E I O U katana talika kwiiya kubbalankanya kulemba mabala (ikujatanya mabala).

(10) Ikucikonzya kubala kanjikanji ncuuba-uba ikwiinda kulemba. Tamweelede kumuka pe kubapa ziiyo zipya zyakubala ikuti naa mwabona sicikolo uulaa penzi lyakulemba.

(11) Ikwiiya kubelesya bboopeni naa mpensulu cilakonzya kuba cintu cikatazya kapati. Mutazumanani ikuyandisya kulemba kuli kabotu!