Amubabikkile Maano Aabo Ibaciswa

Beembezi basiluyando balababikkila maano kapati aabo ibatalanganizyigwi kabotu. Mumbungano imwi aimwi, kuli bamwi ibaciswa ibakkala mumaanda aakulelela baciswa ambweni aabalemene. Akaambo kabukkale oomo mobabede, tabacikonzyi kutola lubazu kapati mukwaambilizya mulumbe wa Bwami. Ambweni coolwe cilikke ncobakonzya kubaancico ncakukambauka kwiinda mukubandika abaabo ibabaswaya, balwazinyina naa aabo babalanganya. Nokuba boobo, kufwumbwa mulimo ngobakonzya kucita wakukambauka ubonwa kuti ulayandika kapati. (Mt. 25:15) Nokuba kuti bakambauka buyo kwamaminiti aali 15, aaya aleelede kulipootwa alimwi bayoozumanana kubalilwa akati kabasikumwaya ba Bwami balyoonse.