Ino Nkaambo nzi Ncotweelede Kukutantamuka Kuvwiya?
1 Ikaambo kapati ncotuteelede kuswiilila kumakani aakuvwiya naa kutola lubazu mukwaambila bamwi makani aaya nkakuti, tuyanda kumukkomanisya Jehova uutayandi kubejelezya bamwi. Aboobo ikuti katuyanda kuba bantu batambulika kuli Leza, tatweelede kubejelezya kufwumbwa muntu ngotwaamba mumubandi wesu.
2 Mutamwiiyi Saatani: Ooyu sikondonyina mupati iwa Leza wakapegwa zina limweelede lyakuti “Diabolosi” ilyaamba “sikubejelezya.” Iciindi Eva naakaswiilila kumakani Saatani ngaakali kumubejelezya Leza, wakaatobela alimwi bantu bakusaanguna bobile bakaandaanizyigwa ku Mulongwe wabo wiinda kubota. (Matl. 3:1-24) Tutayungwi amilimo ya Saatani alimwi akujatikizyigwa mukukanana makani aatali kabotu ngatayandi Leza alimwi aakonzya kutwaandaanya ku Mulongwe wesu wiinda kubota, Jehova Leza.
3 Tutabaswiilili basikuvwiya akaambo kakuti baandaanya balongwe. Ikanjikanji, basikubejelezya balayungizya twaambo kumakani, kupa muzeezo uulubide alimwi akubelesya mabala manji aanyemya. Muciindi cakubandika amuntu ooyo camulomo mpande buya, balo balamuvwiya. Ikanjikanji twaambo twakuyeeyela buyo tulabuka. Aboobo, “kuvwiya kujaya bulongwe.”—Tusimpi 16:28, BT.
4 Tweelede kucenjela kutegwa tutajatikizyigwi mukuvwiya kukonzya kulibonya mbuli kuti tusobana buyo. Ino nkaambo nzi? Nkaambo kakuti ikaambo nkotukonzya kwaamba katutajisi muzeezo wakumunyemya umwi, kalakonzya kubija ikuti naa kaindululwa amuntu uumbi. Kaambo kalakonzya kuyungizyigwa naa kunyonganizyigwa kusikila limwi bamujaila zina muntu ooyu alimwi ampuwo mbotu njaajisi muna Leza ilamana. Ikuti naa cintu cili boobu cacitika, ino inga mwalimvwa buti kuti kamuli ndinywe nomwakatalisya makani naa mwakaambila bantu bamwi? Ibantu balakonzya kumubona kuti muyanda kuleta lupyopyongano alimwi balakonzya kulekela limwi kumvwana andinywe.−Amweezyanisye a Tusimpi 20:19.
5 Kuvwiya kulakonzya kumupa kuti mube babeji: “Majwi aasikuvwiya ali mbuli zilyo zinono, alanjila mukati kabula.” (Tus. 26:22) Ino ncinzi cikonzya kucitika ikuti naa mwakainduluka ikwaamba kaambo kakubeja? Ikwaamba bwini, nokuba kuti muyeeya kuti makani aayo aakubeja ngamasimpe, muli mukubeja iciindi nomwaambila bamwi. Aakuzyibwa makani aaya kuti taali amasimpe, muya kwaambwa kuti muli babeji. Sena mulayanda kuti cintu cili boobu cikamucitikile? Sena Leza tabapi mulandu bamayi bakubeja akaambo kabubeji mubukombi bwabo? Mbocibede buya oobo alimwi ulapa mulandu kubantu babejelezya bamwi. Jesu wakacenjezya kuti: “Ijwi isampu limwi alimwi ndibaamba bantu bazoobetekwa andilyonya mubuzuba bwalubeta. Nkaambo nkumajwi aako nkozoolulamisigwa nkabela nkumajwi aako nkozoopegwa mulandu.” (Mt. 12:36, 37) Mbwaanga “toonse buyo tuleelede kulyaambilila makani esu kubusyu bwa-Leza,” sena inga mwayanda kuyoobetekwa akaambo kakuba basikubeja?−Rom. 14:12.
6 Ikuti twamugwasya muntu kuti aleke kuvwiya, tuli mukucita mulimo mubotu. Kuli kasimpi kaamba kuti: “Uubamba milomo yakwe nguubamba buumi bwakwe, pele uuasama amulomo wakwe ulanyonyooka.” (Tus. 13:3) Aboobo cilasalala kuti, kuli twaambo tubotu ncotuteelede kuvwiya alimwi akubejelezya bamwi.