Makamu-Makamu Ali Mukuyungizyigwa
1 Mbuli mbocakabede mumwaanda wamyaka wakusaanguna, ikuvwula kuli mukucitika mumbungano ya Bunakristo mazubaano kulilibedelede. (Inc. 2:41; 4:4) Mwaka wakamana, basikwiiya bapya basika ku 288,907 bakabbapatizyigwa, icaamba kuti mweelwe waakati-kati wabantu bali 791 bakali kubbapatizyigwa abuzuba! Ibantu batandila ku 1,000,000 bakabbapatizyigwa mumyaka yotatwe yainda. Ncobeni, Jehova uyaabuyungizya makamu-makamu aabantu aabo basyoma.—Inc. 5:14.
2 Bunji bwabantu bapya balo batabuzibide bukkale bwa Bunakristo beelede kugwasyigwa akuyiisyigwa abaabo basimide mulusyomo. (Rom. 15:1) Akati ka Banakristo bakusaanguna, kwakali bamwi bakali kunga nokuba kuti kwakaindide myaka buya kuzwa nobakabbapatizyigwa, bakaalilwa ‘kuya kumbele kumakani aabupati.’ (Heb. 5:12; 6:1) Nkakaambo kaako, mulugwalo lwakwe kuba Hebrayo, Paulo wakatondezya mbazu eezyo mwalo Banakristo mubeelede kukomena munzila yakumuuya. Ino eezi nimbazu nzi, alimwi ino lugwasyo lweelede inga lwapegwa buti?
3 Ikubaa Zilengwa Zibotu Zyakwiiya: (Bahi. 5:13, 14, Ci) Kweelanaa malailile aa Paulo, kuba sikwiiya mubotu kujatikizya kwiiya cakuzumanana, kwiinduluka-induluka alimwi akubelesya “zilyo ziyumu-yumu” zyalo zipegwa a mbunga ya Jehova. (Amubone Ngazi Yamulindizi yamu Chichewa yamu August 15, 1993 mapeeji 12-17.) Kwiinda mukubanjizya aaba basyomi bapya mumibandi yakumuuya alimwi akubaambila twaambo tubotu twabwini ntomwajana kwiinda mukuvwuntauzya kwanu kuli kabotu, inga mwabakulwaizya kubaa zilengwa zibotu zyakwiiya. Ndiza muziindi zimwi inga mwamutamba mupya kubaa ndinywe nemubaa ciiyo canu nobeni naa camukwasyi antela nomulibambila ciiyo ca Ngazi Yamulindizi antoomwe.
4 Ikujanika Kumiswaangano Lyoonse: Icitondezyo canu cibotu alimwi amajwi aakukulwaizya ziya kugwasya bapya mumbungano kutabaa cilengwa cimbi iceelede kucenjelela icakaambwaa Paulo—“cilengwa” bamwi ncobajisi cakulomvwa kumiswaangano ya Bunakristo. (Bahi. 10:24, 25, Ci) Amubagwasye kuzyiba kuti miswaangano ncintu cakumuuya ciyandika kapati kulimbabo ikuti kabayanda kuzumanana mumbungano. Umwi aumwi mumbungano weelede kutola ntaamu yakubacitya kuti balimvwe kuti balitambwidwe camaanza obile mubunyina bwesu. Muciindi cakukkala eelyo noyitanatalika miswaangano, ino mbuti kuti mwatalika kweendeenda kutegwa mulipandulule kubantu basiyene-siyene bamumbungano, ikapati aabo mbomutazyi.
5 Kusikila Jehova Calusyomo: Kutegwa tuzunde kukompama kwesu alimwi akulubizya akaambo kabube bwesu, tweelede kumulomba Jehova mumupailo, akumwaambila zili mumizeezo yesu zyoonse alimwi azyeezyo zyitupa kulibilika kapati. Bapya baleelede kwiiya kuti kwiinda mukumukombelezya Jehova kutegwa abagwasye mbuli Paulo mbwaakakulwaizya, tabakonzyi kuyoosika nkobawa buya. (Heb. 4:15, 16, 10:22) Ikuluula mbuli mbocakabede kuli ndinywe mubukkale buli boobu kuya kuyumya lusyomo lwamupya lwakuti Jehova ulamvwa mipailo iipailwa camoyo woonse.
6 Kulibikkila Ciindi Camumulimo: Paulo alimwi wakatondezya kuti eelyo ‘notupaila kuli Leza lyoonse cipaizyo cakulumba,’ cilatuyumya-yumya munzila yakumuuya. (Heb. 13:15) Sena kuli nomwakayeeyede kutamba sikumwaya mupya umwi kuunkaa ndinywe mumulimo wamumuunda kweelanaa bubambe bwanu bwansondo-ansondo? Antela nywebo anguwe inga mwalibambila nzila mbuli mbomuya kukambauka nekuba kulanga-langa cibeela cimwi camumulimo ooyo mupya ncatanasolede.
7 Makamu-makamu aali mukuyungizyigwa aletela kukkomana kapati, pele beelede kugwasyigwa. Ikuzumanana kwesu mukuyiisya akulaya bapya mumbungano kuya kubagwasya kubaa lusyomo luyumu, lwalo lweelede ‘kuyoobafwutusya.’—Heb. 3:12, 13; 10:39.