Amwaambilizye Kasimpe Kujatikizya Jesu
1 Banakristo bananike, ibali mukugwasyigwa abeenzinyina bambelele zimwi, ‘bajisi mulimo wakwaambilizya bumboni bwa Jesu Kristo.’ (Ciy. 12:17) Ooyu mmulimo uuyandika kapati, mbwaanga nkwiinda mulinguwe alikke motukonzya kujana lufwutuko.—Joh. 17:3; Inc. 4:12.
2 ‘Nenzila, Bwini Alimwi Abuumi’: Jesu wakaamba kuti: “Ndime nzila, ndime bwini, ndime buumi. Takukwe uuza kuli-Taata, pele mulindime.” (Joh. 14:6) Nkwiinda muli Jesu alikke walo uuli ‘nenzila,’ motukonzya kumusikila Leza mumupailo alimwi akubaa cilongwe cibotu Anguwe. (Joh. 15:16) Jesu ‘mbobwini’ mukuti businsimi alimwi azintu zyakali kwiiminina zyakali kuyoocitika kumbele izili mu Magwalo aa Cihebrayo zyakacitika ncobeni kwiinda mulinguwe. (Joh. 1:17; Kol. 2:16, 17) Masimpe, imulimo mupati wabusinsimi bwini-bwini nkusalazya lubazu ndwajisi lutalikomeneni mukuzuzikizyigwa kwamakanze aa Leza. (Ciy. 19:10) Kuyungizya waawo, Jesu ‘mbobuumi.’ Ikutegwa tukatambule cipego cabuumi butamani, toonse tweelede kubaa lusyomo mucipaizyo cakwe cacinunuzyo.—Joh. 3:16, 36; Heb. 2:9.
3 Ngomutwe Alimwi Mwami Uulela: Alimwi bantu baleelede kuzizyiba inguzu zyitalivwulili zyabweendelezi Jehova nzyamupede Mwanaakwe. Jesu wakabikkwa kuba Mwami wa Bwami bwa Leza—‘ngonguwe bantu ngobeelede kuswiilila.’ (Matl. 49:10) Kunze lyaboobo, Jehova wakamusala kuba Mutwe wambungano. (Ef. 1:22, 23) Tweelede kubagwasya bantu mbotwiiya limwi Bbaibbele kuti bamvwisye Jesu mbwayendelezya mbungano alimwi ambwabelesya “muzike musyomesi uucenjede” kwaabila “zilyo [zyakumuuya] kuciindi ceelede.”—Mt. 24:45-47.
4 Mupaizi Mupati Siluzyalo: Mbwaanga wakainda mumasukusyo alimwi amumapenzi naakali muntunsi, Jesu “ulakonzya kubagwasya abo [i]basunkwa.” (Heb. 2:17, 18) Elo cilakkomanisya kaka kubantu batalondokede kuzyiba kuti Jesu ulabeetelela akaambo kakukompama kwabo alimwi caluzyalo ulabaiminina mukukombelezya kwabo! (Rom. 8:34) Akaambo kacituuzyo ca Jesu alimwi amilimo yakwe mbwali Mupaizi Mupati, tulakonzya kumusikila Jehova “cakutayoowa” kutegwa tujane ‘lugwasyo muciindi ncotubula.’—Heb. 4:15, 16.
5 Ikusola-sola kwesu mukuzyibya bamwi kasimpe kujatikizya Jesu akubakulwaizye kumulemeka alimwi akumubelekela antoomwe andiswe.—Joh. 14:15, 21.