Amubagwasye Kuti Bagwasyigwe Kapati Abubambe bwa Leza
1 Ikucikonzya kubala kulagwasya kapati mubuumi. Ikucizyiba kubala kulabujatikizya buumi alimwi azyeelelo zyabukkale zyaumwi. Ikubala kutupa kuti tuye ambele muzintu nzyotuyanda kapati, kusumpula luzibo alimwi anzyotusyoma.—Inc. 17:10, 11.
2 Malipooti atondezya kuti 35 pasenti yabantu mu Zambia tabacizyi kubala pe. Mumasenaamwi, ibantu batacizyi kubala balainda ku 54 pasenti. Camasimpe, akati kabantu aaba kuli Bakamboni ba Jehova ibayandika kuyiisyigwa kubala. Aaba Banakristo batacizyi kubala abalo balayandika, ibunji bwabaaba bamubelekela Leza cakusyomeka kwamyaka minji. Baliyumya nobapenzyegwa akaambo kabukombi alimwi akutondezya luyando ndobajisi kuli Jehova kwiinda mukutobela milazyo yakwe.—1 Joh. 5:3.
3 Ibantu Mbobakonzya Kugwasyigwa: Mbwaanga kuya ambele munzila yakumuuya kuyeeme kapati akubala, kulayandika kapati ikugwasya bantu batacizyi kubala. (Jos. 1:8) Ikapati mumbungano oomo muli bantu banji batacizyi kubala, beelede kucita bubambe cakufwaambana bwakutalisya makkilasi. Ababelesye ibbuku lyakuti Sungwaala Kukubala Akukulemba.
4 Nokuba kuti baalu mbebayooba kumbele mukutalisya makkilasi aakwiiya kubala akubona kuti alacitwa lyoonse, pele toonse tulakonzya kubagwasya bakwesu abeenzuma kwiinda mukubalumbaizya akaambo kakuya ambele mukasimpe. (Tus. 25:11) Ibamwi, akaambo kansoni naa kukomena, balakonzya kuyeeya kuti tacikonzyeki pe kwiiya kubala. Pele, amulange Thout uukkala ku Nsumbu ya Vancouver wakatalika kwiiya kasimpe kali aamyaka iili 95. Mbwaatakacizyi kubala, wakalibombya akulomba mukaintu wakwe kuti amuyiisye kubala kutegwa kajana mpindu kapati mukubala Bbaibbele amabbuku aabandika Bbaibbele. Kakutanainda ciindi cilamfwu wakaiya kubala, aboobo boonse bobile bakayaambele kumuuya, akutondezya kulyaaba kwabo kuli Leza kwiinda mukubbapatizyigwa mumaanzi. (w94-CN 10/1 23) Masimpe, kukomena ansoni tiizyakapa Thout kuleka kwiiya kulibalila mwini ijwi lya Leza.—Jak. 1:25.
5 Zilongezyo Zijanika: Kunze lyakutupa luzibo ilutugwasya kwiiya zinji kujatikizya Leza, ikwiiya kubala akulemba kuletela zilongezyo azimbi. Mucikozyanyo, ilusyomo lwesu mumulimo luyooyaambele kweelana acakuluula ca Edson waku Petauke mbocitondezya. Nokuba kuti wakali kujanika lyoonse kumiswaangano, ikutacizyiba kubala kwakamupa kuti katatoli lubazu kapati mumulimo. Mbwaakali kuyanda kuyaambele alimwi akucikonzya kubabalila Bbaibbele aabo mbaakali kukambaukila, wakayeeya kulilembya mukkilasi yakwiiya kubala. Mumyezi buyo misyoonto, wakaiya kubala alimwi wakajana cibbeeke cakunyamuda mabbuku mumulimo wamumuunda. Kuzwa ciindi eeco, wakayungizya ciindi ncatola lubazu mumulimo alimwi ikanji-kanji ulabeleka kali mupainiya wakugwasyilizya.
6 Imbungano zyoonse zyeelede kutobela malailile aaya kwiinda mukutalisya makkilasi aakwiiya kweelana aziyandika kubusena nkomubede. Tulakonzya kubagwasya aabo ibayanda kwiiya kubala alimwi akubona zilongezyo zitalivwulili ziboola akaambo kakucikonzya kubala Jwi lya Leza akutobela lulayo lwakuti: “Uleelede kubika miyeeyo yako kulindilyo lyoonse buyo, isikati amasiku.”—Jos. 1:8.