Zyakwaambilizya

◼ Mabbuku aakumwaya mu March: Luzibo Lutola Kubuumi Butamani. Atukasolekesye kutalisya ziiyo zya Bbaibbele zyaaŋanda. Ikuti bantu kabalijisi kale bbuku eeli, inga mwamwaya bbuku lya Amububikkile Maanu Businsimi bwa Daniele! April a May: Amwaabile mamagazini aa Ngazi Yamulindizi alimwi a Galamukani! Ciindi nomucita nyendo zyakupilukila kubantu bakatondezya luyandisisyo, ibakonzya kubikkilizya baabo ibakajanika ku Ciibalusyo naa mumilimo iimbi yeendelezyegwa ambungano pele ibataswaangani lyoonse ambungano, amubikkile maano ikubaabila bbuku lya Amukombe Leza. Kuyandika kusolekesya kutalisya ciiyo ca Bbaibbele caaŋanda, ikapati ikuti naa bamwi bakaliiya kale bbuku lya Luzibo alimwi abroshuwa ya Ncayanda. June: Amwiiye ku Mwiiyi Mupati. Ikuti bamwi baamba kuti tabakwe bana, inga mwabaabila ibroshuwa ya Ncayanda. Nomubelesya ibroshuwa, amubikkile maano ikutalisya ziiyo zya Bbaibbele zyaaŋanda.

◼ Iba Ofesi lya Mutabi tabatumini maoda aamabbuku aasikumwaya omwe buyo. Imulangizi weendelezya weelede kubona kwaamba kuti mwezi amwezi kulaambilizyigwa kaitana tuminwa oda yambungano yaamwezi kumutabi kucita kuti boonse ibayanda mabbuku baambile mukwesu uulanganya mabbuku. Kamwaayeyede mabbuku aawodwa buyo caalubazu.

◼ Lyoonse imulembi weelede kubazyibya baku Ofesi lya Mutabi kujatikizya kucinca kuli koonse kwabukkale bwabasikumwaya babbapatizyidwe ibakatumina mafoomu aa Application for Kingdom Hall Construction Volunteer Program (A-25). Ikuti kwaba kucinca kwabukkale bwasikulisungula mbuli leelyo umwi naalonga antela kusalwa kuba mukutausi naa mwaalu, imafoomu mapya ayelede kulembwa akutuminwa cakufwambaana. Ikuti sikulisungula katacili cikozyanyo cibotu mumbungano, ibaalu beelede kubazyibya cakufwambaana ibaku Ofesi lya Mutabi kwiinda mukulemba lugwalo.

◼ Ikuti kakuli ibantu basika ku 20 naa ibainda aawo ibakanza kuzyikuswaya kuofesi lyamutabi ku Makeni, kulayandika kusaanguna kulemba lugwalo naa kuumya luwaile ku Ofesi lya Beteli. Ikweenzyeezyegwa kucitwa buyo mu Muhhulo kusikila muli Bwasanu kuzwa ciindi ca 8:00 hrs kusikila 15:00 hrs. Kunyina kweenzyezyegwa kucitwa pe yainda 15:00 hrs naa mu Mujibelo amu Nsondo. Amutume mweelwe wabantu baboola alimwi abuzuba mbubaya kuboola kubikkilizya aciindi nomulibambide kuswaya. Kamutana nyamuka kuzyikuswaya, amulange-lange Kabbokesi Kamubuzyo ikali mu Mulimo Wesu Wabwami wamu June 2002 kujatikizya nsamino alimwi akulibamba kuli kabotu nokuswaigwa minzi ya Beteli.

◼ Mulawo uujatikizya kubweza zitupa wa National Registration Regulations mu Zambia waamba kuti, ibana Zambia boonse ibajisi myaka iitandila naa kwiinda ku 16 beelede kuunka ku Ofesi lya National Registration lili afwaafwi ankobakkala kuyoobweza citupa cabusicisi. Abaabo bakacinca mazinaabo balayandika kubweza citupa cipya. Boonse aabo bajatikizyidwe bayandika kufwambaana kwaalanganya makani aaya akwaabona kuba umwi wamilawo yamfwulumende Munakristo uuli woonse njayelede kutobela. Baalu alimwi abazyali beelede kucibikka mumizeezo eeci akubayeezya bakwesu alimwi abacizyi bajisi myaka yakuzyalwa iitandila ku 16.