Ibangelo Balatugwasya
1 “Amulange, ndaba anywe mazuba oonse nikuba kusikila kumamanino aaciindi.” Alakulwaizya kaka majwi aayo kuli baabo boonse ibatobela kulailila kwa Jesu kwakuti: “Kamuya mukabaiisye bantu”! (Mt. 28:18-20) Inzila imwi iilibonya kapati Jesu njali a Banakristo bakasimpe nkwiinda mubangelo bakwe. (Mt. 13:36-43) Elo cilakondelezya kapati kwaambilizya “makani mabotu aateeli” antoomwe azilenge zyamuuya zisyomeka!—Ciy. 14:6, 7.
2 Mumulimo Wesu: Ibbaibbele liyubununa kuti bangelo balatumwa “kuya bumubelekela kulibaabo abayoojana kufutuka.” (Heb. 1:14) Mumwaanda wamyaka wakusaanguna, bangelo bakalijisi lubazu mukusololela basikutobela Jesu kujana bantu beelede. (Inc. 8:26) Mazubaano, babelesi ba Leza bazumanana kulibonena bumboni butondezya busolozi bwabangelo. Muziindi zinji, bantu mumaanda bali kwaamba kuti bali kupailila lugwasyo eelyo Kamboni naakabaswaya. Elo tulasekelela antoomwe abangelo ciindi bantu bali boobo nobautambaula mulumbe wa Bwami!—Lk. 15:10.
3 Notukazyigwa: Daniele, beenzinyina bakubusi bana Hebrayo botatwe, mwaapostolo Petro alimwi abamwi buyo banji ibakainda mumasunko aataambiki bakalibonena lukwabililo lwa Jehova kwiinda mubangelo aabo “basintaze basinguzu.” (Int. 103:20; Dan. 3:28; 6:21, 22; Inc. 12:11) Nokuba kuti zimwi ziindi tulakonzya kulimvwa kutyompwa notukazyigwa, tulakonzya kukulwaizyigwa acakacitikila sikukutaukila Elisha naakabona kuti “mbetuli abo mbanji kwiinda mbabo.” (2 Bam. 6:15-17) Nokuba kuti twaandaanizyigwa cakutaliyandila kuzwa kubakwesu Banakristo, tatweelede kutyompwa pe. Jwi lya Leza litusyomezya kuti: “Baangelo ba-Jehova balibazyungulukide bamuyoowa.”—Int. 34:7.
4 Lino-lino makamu-makamu abangelo ayoobanyonyoona boonse abo ibakazya bweendelezi bwa Kristo. (Ciy. 19:11, 14, 15) Notulindila buzuba oobo, atuzumanane kutembaula Jehova cabusicamba, katusinizyide kuti tuyoogwasyigwa kapati amakamu aakujulu aabangelo basololelwa a Kristo.—1 Pet. 3:22.