Ibana Bamukkomanisya Leza
1 Nokuba kuti kuyandisisya kusobana alimwi akubula luzibo kwabana nkubotu, tatweelede kuzyuubya-ubya nguzu zijisi mwana zyakucikonzya kutobela nzyasyoma alimwi akukkomanisya Leza. Caboola kumakani aakutembaula Jehova, kunyina mweelwe wamyaka uubikkidwe nobeelede kutalika.—Mt. 21:15, 16; Joel. 2:28, 29.
2 Mukutondezya lusyomo alimwi akumvwida malailile, bana bamu Israyeli bakeenda mulweendo lwakuzwa ku Egepita alimwi bakatolelela kweenda munkanda kuyookona Nyika Yakasyomezyegwa. (Kul. 12:37) Samuele, ndiza kacili mwana wamyaka yotatwe, wakatalika kuyiisyigwa kubelekela kutente lyakubunganina. Kacili mwana musyoonto, wakalitondezya kuti wakali musinsimi sicamba. (1 Sam. 1:24-28; 3:18, 19) Lweetelelo akusyomeka kuzintu nzyaakazyi kuti zililuzi, kwakakulwaizya mwana musimbi kukombelezya muntu mupati. Aboobo mwaalumi sikalumamba wakalicesya eelyo wakasilikwa munzila iilibedelede. (2 Bam. 5:3; Lk. 4:27) Ikuteelela zintu alimwi akwaambaula kwa Jesu kacili mwana kwakapa kuti bantu bamuciinga cakwe bamukkomanine.—Lk. 2:46-48.
3 Bana sunu babalilwa antoomwe abantu ba Leza. Balakonzya kuba bayumu kumuuya, ibakanzide “kukaka bubi akusala bubotu” alimwi ibalibambilide kulitondezya kuti mbabelesi ba Leza. (Is. 7:16) Ikutegwa bacite boobo bayandika kugwasyigwa. Bazyali bakulwaizyigwa kulela bana babo, “mukubaiisya akubalailila munzila ya Mwami.” (Baefe. 6:4, Ci) Sena inga tiicamupa kukondwa kapati nobazyali ikuba amwana uuyandisisya kubelekela Mulengi? Sena inga tacimupi kukondwa kuzyiba kuti kwiinda muluzibo alimwi amukuswiilila, mwanaanu wakasala kubelekela Leza?
4 Ibbuku lyakuti Amwiiye ku Mwiiyi Mupati lyakalembelwa kukulwaizya bana kuti kabaingula akwaamba mbobalimvwa. Liyoomugwasya kuyiisya mwanaanu luzibo lwini-lwini munzila yabulemu alimwi yaluyando. Mibuzyo njobabuzyigwa iyoobagwasya kuzyiba kuti ncintu ciyandika kapati kulindiswe ikuzyiba mbobayeeya. Zifwanikiso zibotu mbuli zeezyo zijanika apeeji 91, 93, 216, 226 a 237 zilatondezya munzila iikulwaizya kapati kubana kuti beelede kucita zintu zili kabotu.