Amuzumanane Kweenda a Leza

Imwaapostolo Paulo wakatondezya mbociyandika kuzumanana kweenda a Leza naakalemba kuti: “mwakamvwa kale kulindiswe mbumweelede kweenda kukubotezya Leza . . . kamuciya bweendesya munzila eyo njiyonya.” (1 Tes. 4:1) Elo twakali kkomene kaka kuba akati katuulunzuma twabaabo bakazumanana kweenda a Leza mumwaka wamulimo wainda! Twalanga nzyotwakazuzikizya mucisi coonse, atuulange-lange awalo mulimo ngotwakacita mumbungano yesu. Kwiinda mukucita oobo kakunyina akudooneka tuyoobona mbazu motweelede kuyungizya kutola lubazu mumulimo wa Bwami mbuli muswaangano wacooko wamu 2004 mbowakatukulwaizya kucita.

Mu Zambia muli mweelwe wambungano zili 2,136, mumwaka wamulimo wamu 2004 zyakalijisi mweelwe wabasikumwaya bali 118,068 bacita lipooti amwezi. Eeci cakali kukondelezya. Eeci caamba kuti kwakaba kuyungizyigwa kwa 3 pasenti. Cikkomanisya ncakuti mweelwe waziiyo zya Bbaibbele wakaya atala kusika ku 203,691, nokuba kuti kwakaba kuya ansi kuli baabo bakabbapatizyigwa nkokuti kuzwa kumweelwe wa 8,930 mwaka wainda kusika ku 7,758. Sena kuli mbazu zimwi zyamulimo wesu ziyandika kulanganizyigwa?—Mt. 28:19, 20.

Sena mulayeeya Enoki mbwaakeenda a Leza? Tiikwakali buyo kukkala buumi busalala akulilemeka kabotu. Leza wakali kuyanda kuti akambauke. (Jud. 14, 15) Enoki naakali kusoleka canguzu kwaamba twaambo twakali kubanjila mumoyo aabo mbaakali kucenjezya, “wakali kukonda Leza.” (Heb. 11:5) Mbubwenya buyo kuzumanana mukukambauka amukwiisya kwesu takukabi kwabuyo.

Tulatulumba tubunga tunji twabaalu basololela cakusyomeka mukukambauka alimwi cakufwambaana balabunganya malipooti, akulemba akutumina lipooti yambungano kuofesi lyamutabi. Tulangila milimo mipati mumwaka wamulimo wamu 2005 camoyo omwe katukamantene andiswe mukweenda cakukkomanisya Jehova kumwi katulangila buumi butamani!