Amupakamane Kukujana Bantu Basinke Matwi Mucilawo Canu
1 Jehova ulatamba: “Boola. . . . Muntu woonse uuyanda anywe cabuyo maanzi aabuumi.” (Ciy. 22:17) Mweelwe uuyungizyigwa wabantu basinke matwi bali akati kabaabo baingula kukwiitwa ooku. Akaambo kaceeci, mbungano zisyoonto mucisi cesu zijisi tubunga twamwaambo wakutambaika itucita miswaangano yambungano mu Mwaambo Wakutambaika Waku Amelika.
2 Nokuba kuti ibamutubunga twamwaambo wakutambaika babikkila kapati maanu mulimo wabo wakukambauka kukubandika abantu basinke matwi bali muzilawo zyabo, banji babamwi babaaba mucisi cesu baciyandika kujanwa akukambaukilwa.
3 Ino Mbuti Mbomukonzya Kugwasya? Nomuli mumasena aabuleya, sena kuli nomwakabona bantu kababelesya mwaambo wakutambaika? Sena kuli ngomuzi kubusena nkomubelekela naa kucikolo uujisi umwi wamumukwasyi musinke matwi? Amupakamane kukujana baabo basinke matwi nomubeleka milimo yanu yaabuzuba. Pele ino mbuti mbomukonzya kuba masimpe kuti bakambaukilwa mulumbe wa Bwami?
4 Amupe Bukamboni: Amubazibye bamukabunga kamwaambo wakutambaika kali afwaafwi kujatikizya muntu musinke matwi nkwakkala. Basinke matwi banji balafwambaana kuyaambele mukwiiya kasimpe iciindi nobayanzana a Bakamboni basinke matwi kumiswaangano yambungano iicitwa mu Mwaambo Wakutambaika Waku Amelika. Aboobo, ikuti kakuli kabunga kamwaambo wakutambaika mucilawo canu, mulembi wambungano yanu weelede kutuma twaambo tujatikizya basinke matwi boonse bali mucilawo canu kukabunga aako.
5 Ino mbuti kuti kakunyina uuli afwaafwi uukonzya kupa lugwasyo lwakumuuya kubantu basinke matwi bali mucilawo canu? Ino mbuti mbomukonzya kugwasya? Mweelede kupilukila akubandika abamwi bamumukwasyi wauuli aŋanda bakonzya kumvwa. Ikuti kacikonzyeka, amubalombe kuti mweebele vidiyo yamumwaambo wakutambaika kutegwa musinke matwi abe aluyandisisyo. Basikumwaya bamwi bawiiya Mwaambo Wakutambaika Waku Amelika kutegwa bakonzye kukambaukila basinke matwi cakuzwidilila.—Inc. 16:9, 10.
6 Kwiinda mukuba bantu bapakamene mukujana bantu basinke matwi bali mucilawo canu, mulakonzya kubapa coolwe cakunywa cabuyo maanzi aabuumi.—Mt. 10:11.