Lugwalo Luzwa Ku Kabunga Keendelezya
IKUTOBELA cikozyano ca Jesu, tulapaila amoyo omwe kuli Leza kuti: “Alilemekwe izina lyako.” Luyandisisyo ndotujisi lwakupona kweelana amupailo ooyu lulatondezyegwa munzila mbotupona mbotuli Bakamboni ba Jehova. Masimpe, nzinji nzyotuyandika kuziba kutali buyo kuziba zina lya Leza kulikke. Tweelede kubelesya ciindi cili coonse kulilumbaizya zina eelo. Inzya, mbulemu bupati kwiitwa kuti tuli Bakamboni ba Jehova.—Mt. 6:9; Is. 43:10.
Kweelana alugwalo lwa Intembauzyo 110:3, bantu ba Jehova cakuliyandila balatola lubazu mumulimo ooyo Jehova ngwaamba kuti uleelede kucitwa. Nkaambo nzi bantu bamisela yoonse abukkale bwiindene-indene ncobali basungu mumulimo wakukambauka? Cakusaanguna, nkaambo kaluyando ndobajisi kuli Leza akulyaaba kwabo kuli nguwe. Lugwalo lwa Deuteronomo 6:5, 6 lutukulwaizya kuyanda Jehova ‘amoyo wesu woonse, amuuya wesu woonse, anguzu zyesu zyoonse.’ Luyando oolu luzwa mumoyo lutupa kubelesya ciindi cesu, nguzu, alubono lwesu kutola ambele Bwami bwa Leza, zyalo zibikkilizya kutola lubazu mumulimo kusikila mpotukonzya kweelana abukkale bwesu.
Luyando ndwajisi Jehova kubantu ndolumupa kupa malailile aakuti makani mabotu aa Bwami bwakwe akambaukwe nyika yoonse. Tayandi kuti muntu uuli woonse anyonyooke pele kuti aempwe kunzila zyakwe zibi akujokela ku Mulengi wakwe kutegwa akajane buumi. (2 Pet. 3:9) Jehova waamba kuti, “Nsiyandi abuniini kuti sizibi afwe pe, ndayanda kuti aleke bubi bwanzila zyakwe akulijanina buumi.” (Ezk. 33:11) Notutola lubazu mumulimo, tutondezya luyando ndwajisi Jehova kubantuma. Aaka nkakaambo katupa kukkomana kapati notutola lubazu mumulimo ooyu uuyandika.
Luyando ndotujisi kuli Jehova lulatondezyegwa kweelana ambotwaabona Magwalo Aasalala, Ijwi lyakwe lyakasololelwa amuuya. Kakunyina Bbaibbele, notwatalimuzi Leza akuswenenena kuli nguwe kweelana alugwalo lwa Jakobo 4:8 mbolutukulwaizya kucita. Nokuba kuziba kaambo ncotuponena aciyoocitika kumbele. Notwatalizi kuti muzyali wesu wakusaanguna Adamu nguwakaleta mapenzi aatucitikila. (Rom. 5:12) Alimwi notwatalizi luyando lwa Leza lupati lwakupa Mwana wakwe simuzyalwa aalikke kuba cinunuzyo cesu. Munzila zimwi zinji, Jehova ulatutondezya luzibo lwakwe, busongo bwakwe ambwazibona zintu. Elo kaka tulacilumba cipego ncaatupa, Ijwi lyakwe lyakasololelwa amuuya! Ikulumba kwesu kucipego eeci kutukulwaizya ‘kujatisya loko ciindi’ cakubala, cakwiiya acakuyeeyesya ncolyaamba. (Ef. 5:15, 16; Int. 1:1-3) Tatweelede kucuubyaubya ciindi cakubala Jwi lya Leza abuzuba. Muciindi caboobo, luyando ndotujisi kuli Leza lweelede kutupa kubala Jwi lyakwe, akutupa kumuziba kabotu akumuyanda kapati.
Twaiya kuzwa mu Bbaibbele kuti Adamu naakabisyila Jehova, wakapa bana bakwe boonse kubikkilizya andiswe kuti tube mubukkale bubyaabi. Nokuba boobo, Leza ulakonzya alimwi wakatupa nzila yakuzwa mumapenzi akubona kuti makanze aakwe kunyika eeyi azuzikizigwa.—Matl. 3:15.
Kakunyina akudooneka, toonse tuyandisya kusalazya zina libotu lya Leza wesu. Notuyaambele muluzibo lwa Leza mubotu Jehova, tulakulwaizigwa kubelekela antoomwe anguwe ambunga yakwe mukuzibya zina lyakwe libotu alimwi amakanze aakwe. Tulisinizyide kuti tulakkomaninwa anguwe akulongezyegwa anguwe alimwi tuyoojana buumi butamani kumbele munyika mpya.
Swebo tobacibeela caba Kabunga Keendelezya tulamuyanda nobakwesu andinywe nobacizi. Alimwi tuyanda kumulumba kapati kubusungu bwanu bwakubelesya ciindi ciceede “mapenzi ayo mapati” kaatanasika kutegwa tukambaukile bantu banji makani mabotu kusika mpotugolela. (Ciy. 7:14) Kwiinda mukucita boobu, mubapa coolwe ncemunya ncomwakapegwa cakuba aluzibo lwa Leza a Kristo lwalo lusololela kubuumi butamani.—Joh. 17:3.
Tobanyoko,
Kabunga Keendelezya ka Bakamboni ba Jehova