‘Amwaambe Makani aa Leza Cakutayoowa’
1 Sena ziindi zimwi mulawayawaya kwaamba cakulikwaya kujatikizya lusyomo lwanu ikuti mwapegwa coolwe cakucita boobo kucikolo naa kumulimo? Sena cilamuyumina kupa bumboni bwamukwiizya kubasazinyoko alimwi naa bantu mbomutazi? Ino ncinzi ciyootugwasya toonse kubelesya ziindi zibotu ‘kwaambaula makani aa Leza cakutayoowa’?—Flp. 1:14.
2 Mutawayiwayi: Sena inga mwawayawaya kwiiminina mulongwe wanu naa musazinyoko wabejelezyegwa? Jehova Mulongwe wesu wini-wini, wabejelezyegwa citaambiki kwamyaanda yamyaka minji. Eelo kaka tulijisi coolwe citaliboteli cakupa bumboni kujatikizya Leza wesu mupati! (Is. 43:10-12) Luyando lupati ndotujisi kuli Jehova lutupa kulimvwa kwaanguluka naa kutayoowa alimwi lulakonzya kutugwasya kwaambaula cabusicamba kakunyina kuwayawaya kupa bumboni kukasimpe.—Inc. 4:26, 29, 31.
3 Katuyeeya kuti mulumbe ngotukambauka mmakani mabotu. Aabo baya kuutobela uyoobaletela zilongezyo zitamani. Ikubikkila maano mbouyandika mulimo wakukambauka muciindi cakulibikkila maano tobeni naa aabo batukazya, kuyootugwasya kukambauka cabusicamba.
4 Zikozyanyo Zyabantu Bamwi: Tulakonzya kuyumizigwa kuzwa kubantu bamwi basyomeka bakaambaula ijwi lya Leza cakutayoowa. Mucikozyanyo, Enoki wakakambauka lubeta lwa Jehova cabusicamba kubantu basizibi. (Jud. 14, 15) Nowa wakakambauka cakusyomeka kubantu batakali kubikkila maano. (Mt. 24:37-39) Banakristo bamumwaanda wamyaka wakusaanguna bakali “bantu buyo abatakaiya” balo bakazumanana kukambauka nokuba kuti bakali kukazigwa kapati. (Inc. 4:13, 18-20) Mabbuku eesu ciindi aciindi alaba amakani aapandulula zyabuumi bwabantu aabo akaambo kakuba alusyomo muli Jehova bakacileka kuyoowa muntu, eelyo bakaba basikwaambilizya basungu.
5 Tulakonzya kuba basicamba kwiinda mukulanga-langa buumi bwababelesi bakaindi basyomeka balo bakacitikilwa mapenzi. (1 Bam. 19:2, 3; Mk. 14:66-71) ‘Bakaba akaanzambwene muli-Leza wesu,’ eelyo bakaambaula cakutayoowa. Andiswe inga twacita oobo.—1 Tes. 2:2.