Busena Bwesu Busetekene Bwakukombela
1. Ino nguni weelede kupegwa bulemu kukuzwidilila kwamulimo wakuyaka Maanda aa Bwami aabulemu?
1 Mumwaka wa 1999 kwakali kweezyezegwa kuti kwakali kuyandika Maanda aa Bwami aali 1,500 mu Zambia. Kuzwa ciindi eeco kwayakwa kale Maanda aa Bwami aainda ku 1,300. Eeci cilalibonya kufwumbwa nkumwaunka mucisi, icitondezya kuti Jehova ulabalongezya bakombi bakwe amasena aalemekwa aakukombela. Eelo kaka maanda aaya alaletela bulemu kuzina lya Jehova! Ziindi zinji tulaakumvwa bantu kabaamba kuti Bakamboni ba Jehova ‘bazuzya Maanda aa Bwami cisi coonse.’ Imbungano zinji, kaindi bakali kuswaanganina mumasena aatakali kupa kuti Leza apegwe bulemu mbuli munsi aazisamu, muzikolo zyakubbadelela naa muzyaanda-nda. Cakutadooneka Leza nguwapa kuti mulimo ooyu ucitwe.—Neh. 6:16; Zek. 4:6.
2. Ncinzi ncotukonzya kwiiya kuzwa kucikozyanyo ca Esau kujatikizya kulumba kuzintu zyakumuuya?
2 Kamulumba: Ikulumba kuzintu zyakumuuya kulayandika kubakombi ba Jehova. Kuzwa kucikozyanyo ca Esau twiiya kuti, ikuti katutalumbi icilongwe cesu a Jehova inga camana. Ino mbuti mbotukonzya kugwasigwa acikozyayo ca Esau citali kabotu? Tweelede kulumba akaambo kamasena eesu aasetekene aakukombela.
3, 4. Ino mbuti mbomukonzya kulumba kumulimo Wakuyaka Maanda aa Bwami (a) aumwi kumugama? (b) mbungano?
3 Inzila yomwe njomukonzya kubelesya kutondezya kulumba ooku nkwiinda mukusanga mali aakonzya kubelesyegwa mumulimo wakuyaka Maanda aa Bwami. (2 Kor. 9:6, 7) Kaatana yakwa Maanda aa Bwami, bakwesu mumbungano balaamba mali ngobakonzya kunoosanga amwezi kweelana amali aayandika mukuyaka (Mali Aabbadalilwa Ŋanda ya Bwami Amwezi). Kwiinda mukupa mali ngotwakasyomezya, tutondezya kuti tulalumba akaambo kamaanda mapya ngaakatupa Jehova. (Jak. 5:12) Mali aayo aasangwa alabelesyegwa mumulimo wakuyaka Maanda aa Bwami aabaabo babulide.—2 Kor. 8:14.
4 Mbwaanga imbungano zinji zyigwasyigwa kuyakilwa Ŋanda ya Bwami tazikonzyi kulibbadelela, baciinga camuzike bakayeeya kuti bazigwasye eezyo mbungano. Imbungano zili boobu zilatuma mali amwezi kumutabi, aaya mali taali aacikwelete pe, pele ngakusanga kumulimo Wakuyaka Maanda aa Bwami. Bakumutabi balalemba mupepa litondezya bwaapauzi bwamali lituminwa amwezi kuti bakaatambula mali alimwi bakalumba.
5. (a) Ino ninzila nzi imwi njotukonzya kutondezya kuti tulalumba kubusena bwesu bwakukombela? (b) Ino nkaambo nzi kapati ncotweelede kusalazya Ŋanda yesu ya Bwami akwiibamba kabotu?
5 Cilayandika Kubamba Maanda Eesu aa Bwami: Aimwi nzila njotukonzya kutondezya kuti tulalumba nkwiinda mukusalazya Maanda eesu aa Bwami. Mbwaanga Maanda aa Bwami ajisi zina lya Jehova, cilayandika kapati kuti kaasalazigwa akubambululwa muyandika. Maanda aaya ngaa Jehova kutali eesu. Akaambo kakubula mali mumbungano, nitwatakacikonzya kuyaka ŋanda mbotu yakukombela. Aboobo, akaambo kaluyando lwa Jehova, lino tulakonzya kuba a Ŋanda ya Bwami mpya. Sena tatukonzi kulumba kapati kwiinda mukusalazya busena oobu busetekene bwakukombela? Ikuti naa twaalilwa kusalazya Ŋanda ya Bwami tulakonzya kusampuzya zina lya Jehova.—Neh. 1:3; 2:17.
6. Ino makani nzi aakatambulwa kumutabi?
6 Imbungano zinji zicita kabotu mukusalazya Ŋanda ya Bwami. Nekuba boobo, kuli mbungano zimwi zitaubikkili maano mulimo ooyu. Bakumutabi batambula makani aakuti kuli Maanda aa Bwami aatabambwi kabotu. Aamwi ajisi bwaanda bupandaukide, bwaanda bulaadooti, mabbenci akapandauka, zintu zitabambidwe kabotu muyobodwa zintu, mpulungwido zipandaukide, anze taasalazidwe azimbuzi zyakasinka azyakukkalila zyakapandauka. Ootu totwaambo tumwi twakatambulwa. Sena kutwaambo ootu twaambwa kuli mbuyajatikizigwa Ŋanda yenu ya Bwami?
7. Ino nkaambo nzi akamwi kakonzya kutupa kusalazya Maanda eesu aa Bwami akwaabamba kabotu?
7 Mbumunya mbokwaambwa kale, ikaambo kapati katupa kubamba Maanda eesu aa Bwami nkakuti izina lya Jehova lilijatikizidwe. Kaambo kamwi nkakuti kuyaka Ŋanda ya Bwami kuyandika mali manji. Mazuba aano, Ŋanda ya Bwami nsyoonto iiyakwa mu Zambia ilakonzya kutola mali aasika ku K40,000,000 naa K50,000,000. Cilayandika kwaalanganya kabotu Maanda eesu aa Bwami nkaambo mali aakabelesyegwa ngamulimo uusetekene. Aboobo, aaya mali alasangwa abasikumwaya ibasanga kweelana amali ngobajisi ikutali akaambo kakuti balivwubide. (Mk. 12:41-44) Kutubikkila maano twaambo ootu kuya kutupa kuti katwaabamba maanda eesu.
8. Ino mbaani beelede kubamba Ŋanda ya Bwami?
8 Nokuba kuti bunji bwa Maanda aa Bwami ngamutabi, masena aaya akukombela akaabwa kuli Jehova. Aboobo imbungano aimwi yeelede kubikkila maano kusalazya ŋanda ya Leza. Zimwi ziindi imbungano zilaakulembela kumutabi ikulomba kuti bacince zijazyo amusemu wacijazyo (doorframes) zyamana kubumbwa cuulu naa zyakanyonyoonwa amvwula naa muwo, kubambulula zintu zilaalwanzi naa ikucinca masenke aakanyonyooka. Nokuba boobo, imulimo ooyu weelede kucitwa ambungano.—Neh. 10:39.
9. Ino ncinzi ciyandika kutegwa Maanda aa Bwami kaabambwa kabotu?
9 Ikuti naa mwazizyiba zintu ziyandika kubambwa, inga mwacita oobo cakufwambaana ipenzi kalitana komena. Tulaakubona kuti naa lwaanzi lwatasinkwa cakufwambaana, inga lwakomena. Imasenke kuti kataagagailidwe kabotu inga atolwa amuwo akunyonyoonwa. Kuzikwabilila zintu akuzibamba mbuzyafwida buyo cilakozya kupa kuti mali abbadelwa aceye kwiinda akonzya kubbadelwa kuti cintu cafwidalyo. Imbungano zyeelede kuyobola mali aakubelesya amwezi aakuuzya ziyandika nobasalazya Ŋanda ya Bwami kutegwa mulimo ucitwe kabotu. (1 Kor. 16:2) Kwiinda mu Bubambe Bwakugwasilizya ku Ŋanda ya Bwami, ofesi yamutabi iyakugwasya buyo baabo ibayandika lugwasyo cakufwambaana.
10. Ino nkaambo nzi ncocinga cainda kubota kwiita bakwesu bauzyi kabotu mulimo ikuti kakuli zintu ziyandika kubambwa ku Ŋanda ya Bwami?
10 Nomulanganya twaambo kujatikizya zintu ziyandika kubambwa, inga cainda kubota kwiita bakwesu bauzyi kabotu mulimo kutegwa bagwasye. (Kul. 35:30-35) Ikuti twacita oobo inga twasyoma kuti mulimo wacitwa kabotu, aboobo takukabi cintu cikonzya kutunjizya muntenda.
11. Mbaani beelede kutola lubazu mumulimo wakubamba Ŋanda ya Bwami, alimwi ncikozyanyo cani cikonzya kuyiigwa?
11 Amutole Lubazu Mukubamba Ŋanda Yanu ya Bwami: Cilakulwaizya kaka kubona baalu abakutausi kabatola lubazu mukubamba akusalazya Ŋanda ya Bwami! Nehemiya wakapa cikonzyanyo cibotu kapati. Kwiindana abalangizi bakataanguna katanaba mulangizi walo, Nehemiya tanaakabadyaaminina bantu ba Leza naa kubasinikizya kuti batole lubazu. Tanaakayanda kuti bantu bamupe bulemu bwiindilide. Pele walo wakatola lubazu mumulimo camoyo oonse. Aboobo ncakaambila kuti, “Pele mebo teendakacita obo pe, nkaambo kakuyoowa Leza. Ayalo milimo eyo yakuyaka bulambo, ndakakakatila kulinjiyo.” (Neh. 5:15-16) Inzya wakatola lubazu mukuyakulula bulambo bwamunzi.
12. Ino mbaani bakonzya kutola lubazu mumulimo wakubamba Ŋanda ya Bwami?
12 Kubbuku lya Nehemiya 3:12 tubala muntu aumwi uuli ampuwo wazina lya Salumu. Walo abana bakwe basimbi tiibakayanda kulitukumuna pe, pele bakatola lubazu mumulimo. Toonse tweelede kulimvwa boobo mukubamba Maanda aa Bwami mbuli mbubakacita ba Nehemiya, Salumu amukwasyi wakwe. Tweelede kucibona kuti ncoolwe cipati ikucita mulimo wakubamba Ŋanda yesu ya Bwami.
13. Ino makanze nzi ngotweelede kuba aangayo kujatikizya Maanda eesu aa Bwami?
13 Mutailekelezyi Ŋanda ya Leza Wanu: Sena twaambo twaambwa tubeleka buyo kumbungano eezyo zijisi Maanda aa Bwami akayakwa alugwasyo lwa mutabi? Peepe. Kufwumbwa naa mbungano eeyo iswaanganina muŋanda iilibuti pele kabayaamba kuti ni Ŋanda ya Bwami, eeyo ŋanda yeelede kuti kaiboneka kabotu kweelana azina iili mpawo yakuti, Ŋanda ya Bwami ya Bakamboni ba Jehova. Yeelede kuti kailibonya kabotu akati kamaanda oonse, kaisalazigwa akubambwa kabotu kutondezya kuti mbusena bwabukombi bwakasimpe. Makanze eesu ayelede kuba aakuti katwaabikkila maano masena eesu aasetekene aakukombela alimwi tatweelede kwiilekelezya “ŋanda ya-Leza wesu.”—Neh. 10:39.