Sena Mukwasyi Wanu Ulimukulibambila Kuyoofwutuka?
1 Businsimi bwamu Bbaibbele ibwazuzikizyigwa kale bupa bumboni ibusinizya kuti mamanino aanyika eeyi mbyaabi alaafwaafwi kapati. Cino ciindi tukkede muziindi zikatazya zikozyanya kapati akuciindi kalitanacitika Zambangulwe. (Mt. 24:37-39) Nowa wakafwutuka kulunyonyooko lwanyika yakumazuba aansiku akaambo kakuti “wakali kweenda a-Leza.” (Matl. 6:9) Kulangilwa kuti Nowa wakabayiisya bamumukwasyi wakwe kujatikizya malailile aa Jehova nkaambo abalo bakafwutuka ku Zambangulwe. Ino muunzila nzi motukonzya kumwiiya Nowa kutegwa tulibambile toonse mumukwasyi kuyoofwutuka kumamanino aabukkale oobu bubyaabi bwamazuba aano?
2 Mukambausi Wabululami: Nowa wakakakatila kwamyaka iibalilwa ku 40 kusikila ku 50 kali “mukambausi wabululami.” (2 Pet. 2:5) Tacikwe makani naa basimukobonyina bakayungwa abangelo bakazanga ibakalisamika mibili yabuntu naa pe, kulangilwa kuti bakamufwubaazya Nowa akaambo kabukambausi mbwaakali kucita. Mulimo wesu taubikkilwi maanu kanji-kanji alimwi balatusampaula, icitondezya masimpe kuti mamanino aanyika eeyi alaafwaafwi. (2 Pet. 3:3, 4) Nokuba boobo, mukwiimpana abantu bamumazuba aa Nowa, bantu banji balaswiilila notukambauka eelyo ‘bakunkulikila’ kubukombi bwa Jehova. (Is. 2:2) Tuyoolifwutula ‘tobeni alimwi abaabo batumvwa’ lilikke buyo kuti twakakatila. (1 Tim. 4:16) Elo kaka cilayandika kapati kuti bazyali kabayiisya bana babo kujatikizya mbouyandika kucitwa cakufwambaana mulimo wakukambauka kwiinda muzyintu nzyobaamba alimwi akwiinda mukupa cikozyanyo!—2 Tim. 4:2.
3 Wakacita “obo”: Kufwutuka kwa Nowa alimwi amukwasyi wakwe kwakayeeme akutobela kabotu-kabotu malailile aa Jehova nkobakacita. (Matl. 6:22) Alimwi cilayandika kuti mazuba aano katuli bantu “balibambilide kuswiilila” malailile aazwa mu Bbaibbele alimwi akumuzike musyomesi. (Jak. 3:17, NW) Banabakwabo bamwi mumukwasyi umwi balayeeya bausyi mbobakabelesya malailile aakazwa kumbunga ya Jehova. Mucikozyanyo, bausyi bakali kweendelezya ciiyo camukwasyi nsondo ansondo alimwi bakali kuunka antoomwe amukwasyi mubukambausi kumamanino aansondo aimwi kweelana ambwaakaamba malailile. Bakali kubweza mwana omwe-omwe akuunka limwi mumulimo nsondo ansondo. Kutazungaana kwabo mukucita “obo” kwakabakulwaizya kapati bana babo, aboobo boonse bali cisambomwe nobakakomena bakaba babelesi ba Jehova basyomeka.
4 Mamanino aabukkale bwanyika eeyi ayooboola cakutayeeyelwa pe. (Lk. 12:40) Kwiinda mukwiiya Nowa alimwi akuba alusyomo kulufwutuko, swebo alimwi amukwasyi wesu tuyooba bantu balibambilide ncobeni.—Heb. 11:7.