Ino Mbweendelezi Bwani Mbomuyoosala?
1. Ino nkaambo nzi Banakristo ncobakambaukila?
1 Kutegwa agwasye bantu kusala camaano kujatikizya bweendelezi, Jesu wakatuma basikwiiya bakwe kuti bakambauke “Makani Mabotu aa-Bwami,” mamanino aabukkale bwazyintu oobu kaatanasika.—Mt. 24:14.
2. Ino nkaambo nzi ncotutakonzyi kwaamba kuti, mukusumpula Bwami bwa Leza Banakristo tabazilemeki mfwulumende zyeendelezyegwa abantu?
2 Mukusumpula Bwami bwa Leza, Bakamboni ba Jehova tabatoli lubazu mutwaambo twacisi naa kukazya mfwulumende zyacisi. (Tit. 3:1) Muciindi caboobo, tusoleka kugwasya bantu bayanda bululami kuti batobele njiisyo zigwasya izyamu Bbaibbele. Kwaambisya, tusoleka kubayiisya mbobakonzya kutobela njiisyo zyamu Bbaibbele alimwi akulangila ku Bwami bwa Leza bwalo ibuli mbobulangizi bwini-bwini bwabantu.
3. Ino nkaambo nzi kusumpula Bwami bwa Leza ncocili kabotu alimwi ancocigwasya?
3 Zilongezyo Kuli Baabo Balibombya ku Bwami: Jesu wakali kucita nzyayanda Leza lyoonse. Aboobo, muciindi cakulisalila kucita zyintu kweelana ambwayanda mwini alimwi akusoleka kugwasyilizya naa kusumpula bukkale bwazyintu bwakaliko ciindi eeciya kwiinda mukutola lubazu mutwaambo twacisi, wakabeleka canguzu mukusumpula zyintu zya Bwami bwa Leza, bwalo bulikke ibukonzya kumanizya mapenzi aacitikila bantu boonse. Akaambo kakusyomeka kwakwe wakapegwa cuuno cabulemu kujulu. Elo kaka mbulumbu butaliboteli oobu mbwaakapegwa akaambo kakulibombya nkwaakacita kuli Leza!—Dan. 7:13, 14.
4. Ino mbuti Bwami bwa Leza mbobuyoozuzikizya nzyobayandika kapati bantu?
4 Bantu banji kapati mazuba aano ibaiya Jesu mukubikka Bwami bwa Leza mubusena bwakusaanguna alimwi amukucita kuyanda kwa Leza abalo bajisi cipego cibotu—icoolwe cakuyoolelwa a Bwami bwa Leza kabali anyika. (Mt. 6:33) Mubulelo bwa Bwami oobu, bantu bayoogwasyigwa kuti balondoke, kabajisi bulangizi bwakuba abuumi butamani. (Ciy. 21:3, 4) Lugwalo lwa 1 Johane 2:17 lwaamba kuti: “Nyika ilamana, azisusi zyayo, pele oyo uucita makanze aa-[Leza] ulakalilila kukabe kutamani.” Saatani alimwi abasikumutobela bayoogwisigwa, eelyo inyika yoonse iyooba paradaiso kakutakwe kusalaulana mubala, lweeno mumakani aamakwebo alimwi abukombi bwakubeja, ciyooba cintu cikondelezya kapati kaka ikupona anyika iino kusikila kukabe kutamani!—Int. 37:29; 72:16.
5. Ino nkaambo nzi ncoceelela kwiita mulumbe ngotukambauka kuti “Makani Mabotu”?
5 Masimpe, Bwami bwa Leza mbobukonzya kuleta lukkomano lwini-lwini munyika, alimwi mulumbe iwaambilizya Bwami oobu cakweelela wiitwa kuti makani mabotu.