Lugwalo Luzwa ku Kabunga Keendelezya
Nomuyandwa Bakambonima ba Jehova:
Elo kaka cilakkomanisya kumulembela lugwalo nobakwesu bayandwa! Tulimvwa mbwaakalimvwa mwaapostolo Johane iwakaamba kuti wakali ‘kubayandisya’ basyominyina alimwi wakakkomana kubona kuti “baleenda mulusinizyo.” (2 Joh. 1, 4) Lusyomo lwa Bunakristo bwakasimpe lulatugwasya kapati! Ikasimpe katunununa kunjiisyo alimwi atunsiyansiya twa Babuloni Mupati itusampaula Leza. Kutobela ncoliyiisya Bbaibbele kwapa kuti tube aluyando, luzyalo abuuya. Alimwi kasimpe kapa kuti tube bantu basalala mumeso aa Leza alimwi akuba abulangizi bwakuyooba abuumi butamani.
Alimwi tulamulumba kaka Jehova akaambo kamuuya wakwe uutusololela abuzuba akutuyumya! Tusyoma kuti mwakakkomana kulanga-langa nzila ziindene-indene Jehova mbwatusololela caluyando akutuyumya kwiinda mumuuya wakwe lya Muswaangano Wacooko wakuti “Amusololelwe Amuuya wa Leza.” Mbobuya bwiindila kubija bukkale bwamunyika, cilayandika kapati kuti katusyoma muuya wa Jehova uuli anguzu kuti utusololele mumazuba aakatazya kapati ngotulangila kumbele.
Tuli masimpe kuti mwakakulwaizyigwa nomwakali kubala makani aakkomanisya aali mu Yearbook amumabbuku aambi aatondezya mbobakaliyumya bakwesu nobakali kupenzyegwa kapati akaambo kalusyomo lwabo. Alimwi cilakulwaizya kubona kuti bunji bwabakwesu aaba basyomeka bakazwa akubbapatizyigwa alimwi bamwi tiibakalina akubbapatizyigwa mapenzi naakabasikila. Tulabayanda kaka akaambo kakusyomeka alimwi akujatisya bululami bwabo! Masimpe, cikozyanyo cabo cilatuyumya kuti aswebo tuzumanane kusyomeka ku Bwami ziyume zitete.—1 Tes. 1:6-8.
Nobakwesu abacizyi bayandwa, tulizyi kuti kuli mapenzi manji aamusikila mubuumi bwenu ngomweelede kuzunda kutegwa muzumanane kuyaka mikwasyi yenu muluyando. Nobamwi mane cilamuyumina kutola lubazu mumulimo wakukambauka akujanika kumiswaangano yambungano lyoonse. Nkakaambo kaako, notwakamana kwaapailila akwaabandika makani aaya, twakacinca bweende bwamiswaangano yambungano kutalikila mu January 1, 2009. Tusyoma kuti bubambe oobu buya kumugwasya kuba aciindi cinji cakuba aciiyo cenu nobeni alimwi acamukwasyi.
Cilakkomanisya kubona kuti bantu banji bakeelela akubbapatizyigwa kumiswaangano yaalubazu, yabbazu alimwi ayacooko yakacitwa mwakali. Akati kabaaba kwakali bana basyoonto. Tulamulumba kapati nobazyali akaambo kakubayiisya kasimpe bana benu alimwi akubakulwaizya kulyaaba kuti babelekele Jehova nobacili bana. Ikulyaaba kwabo alimwi akweelela kubbapatizyigwa nokuba kuti balasikilwa masukusyo manji kucikolo ncitondezyo cakuti nobazyali mubayiisya kabotu bana benu.—Int. 128:1-6.
Alimwi tulalumba akaambo kakuya ambele kwamulimo wakuyiisya bantu Bbaibbele—bamamisyinali abapainiya baalubazu bakabeleka canguzu kutegwa kube kuya ambele ooku. Toonse notuli mu Kabunga Keendelezya tulamulumba kapati akaambo kamulimo mupati ngomucita nobakwesu abacizyi munyika yoonse wakwiita babombe myoyo kuti ‘Amuboole!’ kutegwa abo boonse bafwide nyota ‘banywe cabuyo maanzi aabuumi.’ (Ciy. 22:17) Twabatambula amaanza obile mumbungano yanyika yoonse ibali 289,678 ibakalyaaba akubbapatizyigwa mumwaka ooyu wainda!
Cilayandika kapati kuti lyoonse katwaayeeya majwi aamwaapostolo Johane, iwakalemba kuti: “Nyika ilamana, azisusi zyayo, pele oyo uucita makanze aa-Taata ulakalilila kukabe kutamani.” (1 Joh. 2:17) Lino tupona muciindi nyika eeyi noili afwaafwi ‘kumana.’ Aboobo, cilagwasya ikubikkila maano kumulimo wa Leza alimwi akuzumanana ‘kulangila.’ (Mt. 24:42) Ikucita boobo tacili cabuyo pe, tuyoojana zilongezyo zinji muluzyalo lwa Jehova.—Is. 63:7.
Tulamuyanda kapati alimwi tulamuyeeya akumupailila lyoonse. Jehova amulongezye.
Tobanyoko,
Kabunga Keendelezya ka Bakamboni ba Jehova