Kukambauka Kulatuyumya Kumuuya
1. Ino mbubotu nzi mbotujana notutola lubazu mumulimo wakukambauka?
1 Ikutola lubazu mumulimo wakukambauka kulakonzya kuyumya cilongwe cesu a Jehova alimwi kutupa kukkomana. Ikaambo kapati ncotukambaukila nkakuti tuyanda kukkomanisya Jehova. Nokuba boobo, kwiinda mukutobela mulawo wakuti “ukambauke Makani,” tulalongezyegwa a Jehova alimwi tulagwasyigwa munzila zinji. (2 Tim. 4:2; Is. 48:17, 18) Ino mbuti kukambauka mbokukonzya kutuyumya akutupa kukkomana?
2. Ino mbuti kukambauka mbokutuyumya?
2 Tulayumizigwa Akulongezyegwa: Kukambauka kutukulwaizya kubikkila maano kuzilongezyo zya Bwami bwa Leza muciindi cakubikkila maano kumapenzi ngotujisi. (2 Kor. 4:18) Ikupandulula njiisyo zyamu Bbaibbele kupa kuti tube alusyomo luyumu muzisyomezyo zya Jehova alimwi kutupa kukayandisya kasimpe. (Is. 65:13, 14) Notugwasya bamwi kuba acilongwe a Jehova kutegwa ‘batabi banyika,’ tulakulwaizigwa kuzumanana kulyaandaanya anyika.—Joh 17:14, 16; Rom. 12:2.
3. Ino mbuti mulimo wakukambauka mboutugwasya kuba abube bwa Bunakristo?
3 Ikutola lubazu mumulimo wakukambauka kutugwasya kuba abube bwa Bunakristo. Mucikozyanyo, ikuba ‘mbubabede bantu boonse,’ kupa kuti tube babombe moyo. (1 Kor. 9:19-23) Notubandika abantu ‘bakatede akumwaika mbuli mbelele zitakwe mweembezi,’ citukulwaizya kuba alubomba. (Mt. 9:36) Ikuzumanana kukambauka notukazyigwa cituyiisya kuliyumya. Ikulyaaba kwesu kutegwa tugwasye bamwi kutupa kukkomana kapati.—Inc. 20:35.
4. Ino muubona buti mulimo wakukambauka?
4 Eelyo kaka ncoolwe ikubeleka mulimo uutembaula Leza ngotweelede kukomba, Jehova! Ikukambauka kulatuyumya. Notutola lubazu mumulimo ‘wakulungulula makani mabotu,’ tulalongezyegwa kapati.—Inc. 20:24.