“Amuliyobole Muluyando lwa Leza”
1. Ino ibbuku lyakuti “Amuliyobole Muluyando lwa Leza” lyakalembelwa nzi?
1 Eelyo kaka tulikkomene ikuba aabulangizi bwakutalika kwiiya bbuku lyakuti “Amuliyobole Muluyando lwa Leza” a Ciiyo ca Bbaibbele Cambungano munsondo iitalika mu February 15! Lugwalo Ibakabunga Keendelezya ndobakalembela aumwi uuyanda Jehova lujisi majwi aaya nkoluli kumamanino: “Tusyoma kuti bbuku eeli liya kumugwasya kuzumanana kucita zyintu kweelana akasimpe kamu Bbaibbele akuliyobola ‘muluyando lwa Leza akulangila buumi butamani.’—Juda 21.”
2. Ino bbuku eeli lipya liyakutugwasya mumbazu nzi zyabuumi bwesu?
2 Ncotweelede Kulangila: Ino mbuti njiisyo zyamu Bbaibbele mbozikonzya kutugwasya caboola kumakani aabalongwe, zyakulikondelezya, kulemeka bweendelezi, ziyanza zyesu, lukwatano, ŋambawido alimwi azilengwa? Manjezyeezya eesu ayakweendelana azyeelelo zisumpukide izijanika mu Jwi lya Leza. (Int. 19:7, 8) Mbotuya bumvwisya mbwayeeya Jehova, tuyookulwaizigwa kumumvwida mumbazu zyoonse zyabuumi bwesu akaambo kakuyanda kumukkomanisya.—Tus. 27:11; 1 Joh. 5:3.
3. Ino nkaambo nzi ncotweelede kutola lubazu muciiyo cicitwa amvwiki?
3 Amukatole Lubazu: Nomulibambila ciiyo, amube ambaakani yakutembaula Leza akati kabantu bakwe babungene. (Heb. 13:15) Imbungano yoonse iyakwiiya bbuku eeli lipya antoomwe. Zibeela zifwaafwi zyakwiiya ziya kupa kuti toonse katulibambila kabotu, aboobo tatukawayi-wayi ikwaamba nzyotwalibambila. Ibwiinguzi bwesu bugaminide ibutondezya kuti twalibambila kabotu buya kupa kuti bamwi bakulwaizigwe muluyando akucita milimo mibotu alimwi buyoopa kuti ciiyo kacikkomanisya akugwasya. (Heb. 10:24) Alimwi tulakonzya kuba alukkomano kwiinda mukwaamba zyintu nzyotusyoma.
4. Ino nkaambo nzi ncociyandika kapati kubamba milawo ya Jehova?
4 Imasiku, mubuzuba bwakwe bwamamanino kali anyika, Jesu wakaamba kuti ikubamba milawo ya Jehova kuleendelana akukkalilila muluyando lwa Leza. (Joh. 15:10) Kwiinda mukubelesya bbuku lya “Luyando lwa Leza,” tuyoozumanana ikubelesya njiisyo zyamu Bbaibbele mubuumi bwesu bwabuzuba abuzuba alimwi tuyookkalilila muluyando lwa Leza.—Jud. 21.