Lugwalo Luzwa ku Kabunga Keendelezya
Nomuyandwa Bakambonima ba Jehova:
Eelyo kaka ncoolwe citaliboteli ikwiitwa azyina lya Mwami Wakoonse Koonse, Jehova! Eeli zyina talyeeli, talikonzyi kumwaigwa alimwi talikonzyi kweelanizyigwa azyina limbi. Ngu Jehova wakatupa zyina eeli, alimwi kuzwa mumwaka wa 1931, tubelesya zyina eeli ililibedelede. (Is. 43:10) Tatulisendi kwaambila bantu kuti tuli Bakamboni ba Jehova.
Diabolosi ujisi bubi kusola kuzimaanya zyina lya Leza. Mbokunga beendelezyegwa anguwe, bamasi balalikaka zyina lya Jehova. Babuloni Mupati, bulelo bwanyika yoonse bwabukombi bwakubeja, taliyandi zyina lya Leza alimwi waligusya muma Bbaibbele manji. Mukwiimpana, Jesu wakalemya zyina lya Bausyi, akulibikka mubusena bwakusaanguna mumupailo wacikozyanyo ngwaakayiisya basikumutobela. Wakaamba kuti: “Mbuboobu mbumweelede kukomba: Taateesu ooli kujulu, alilemekwe izina lyako.” (Mt. 6:9) Kumane mumupailo uuzwa ansi amoyo, wakaamba kuti: “Ndakazibya zina lyako kubantu mbookandipa abali ansi.” (Joh. 17:6) Mbokunga tuyanda kutobela cikozyanyo cibotu ca Jesu, tulikanzide lino kwiinda lyoonse kwaambilizya zyina lya Jehova cabusungu munyika yoonse.
Lugwalo lwamwaka wa 2009 lwakuti: ‘Amulungulule makani mabotu,’ lwakatukulwaizya kucita mulimo wesu cabusungu. (Inc. 20:24) Tacidoonekwi buya kuti Jehova wakaulongezya kapati mulimo wesu mumwaka wainda. Bumboni butaambiki bwakapegwa munyika yoonse alimwi eeci cakapa kuti izyina lya Jehova lilemekwe. Kwakaba mweelwe waatala wabasikumwaya wa 7,313,173, alimwi aaba bakatola lubazu mukukambaukila bantu boonse, alimwi akuyiisya baabo ibasola kujana nzila zyakumana mapenzi aabacitikila abuzuba. Bantu ibasika ku 18,168,323 ibakajanika ku Ciibalusyo calufwu lwa Kristo, ncitondezyo cakuti tuulunzuma twabantu tulakonzya kwiita azyina lya Jehova mamanino aabweende bwazyintu oobu kaataninga kusika.
Kufwumbwa kuti Jehova kacituzumizyide, tuya kuzumanana kukambauka cabusungu makani mabotu aa Bwami, kwiinda mukubelesya nzila iiliyoonse yakubandika abantu muzilawo zyesu. (Mt. 24:14; Mk. 13:10) Kufwumbwa naa tukambaukila kuŋanda aŋanda, mumigwagwa, kulemba magwalo, luwaile, naa tucita bukambausi bwamukwiizya, atusolekesye kusikila mpotukonzya kuyiisya bantu banji kuti balizyibe zyina lya Jehova alimwi amakanze aakwe.
Tulijisi twaambo tunji itutupa kusyoma kuti ino-ino buyo Jehova uyakubweza ntaamu kusalazya zyina lyakwe. (Ezk. 36:23) Ciindi ncaya kunyonyoona baabo ibamusampula cilaafwaafwi kusika. Eelyo kaka buzuba oobu buya kukondelezya kubabelesi boonse ba Jehova ibasyomeka, aabo ibaambilizya zyina lya Leza alimwi ibalemya bweendelezi bwakwe bwakoonse koonse!
Luyando lwa Jehova kubantu bakwe lwakalibonya caantangalala Kumiswaangano Yacooko Ayamasi iyakajisi mutwe wakuti, “Amulangile!” iyakacitwa mumasena manji aamunyika mu 2009. Miswaangano eeyi ilaakati kazyintu zyakacitika mumbunga yeendelezyegwa a Leza izitakalubwi, alimwi yakatukulwaizya kuzyiba mbociyandika kulangila buzuba bwa Jehova.—Mk. 13:37; 1 Tes. 5:1, 2, 4.
Masimpe, Jehova mubotu; utupa kukkomana. Ulatooneka mumacelelo aamweemvwe, ulatweenzya kumbali lyamaanzi aacilyookezezyo.—Int. 23:1, 2; 100:2, 5.
Amusyome kuti Jehova uyakuzumanana kumulongezya ikuti mwazumanana kubeleka cabusungu mumulimo wa Bwami mumyezi iiboola.
Tulamuyanda kapati nyoonse mumbunga yabunyina yanyika yoonse,
Tobanyoko,
Kabunga Keendelezya ka Bakamboni ba Jehova