‘Makani Mabotu Aaya Aya Kukambaukwa’
1. Ino tuzyi buti kuti kunyina uukonzya kupa kuti mulimo wakukambauka utacitwi?
1 Masimpe ngakuti kunyina cikonzya kumukasya Jehova kuzuzikizya makanze aakwe. (Is. 14:24) Nokuba kuti cakali kulibonya kuti Mubetesi Gideoni abasankwa bakwe bali 300 tabakonzyi kuzunda basikalumamba bana Midyani ibakali 135,000, Jehova wakamwaambila kuti: ‘Ulavuna bana Israyeli kumaanza aabana Midyani. Sa teensi ndime ndakutuma na?’ (Bab. 6:14) Ino mulimo nzi Jehova ngwagwasyilizya mazuba aano? Jesu wakaamba kuti: “Makani Mabotu aa-Bwami azookambaukwa munyika yoonse.” (Mt. 24:14) Kunyina muntu uukonzya kupa kuti mulimo ooyu utacitwi.
2. Ino nkaambo nzi ncotukonzya kusyoma kuti Jehova ulakonzya kutugwasya toonse mumulimo wakukambauka?
2 Jehova Ulatugwasya Toonse: Nokuba kuti tulizyi kuti Jehova ulakonzya kupa kuti Bakamboni bakwe bazwidilile, sena tulasyoma kuti Jehova ulakonzya kumugwasya muntu aumwi? Mwaapostolo Paulo naakali mumapenzi, Jehova wakamugwasya kwiinda mu Mwanaakwe Jesu. (2 Tim. 4:17) Andiswe tulakonzya kusyoma kuti Jehova ulakonzya kutugwasya toonse kutegwa tuzuzikizye mulimo wakwe.—1 Joh. 5:14.
3. Ino Jehova utugwasya mubukkale buli buti?
3 Sena zyintu nzyotucita abuzuba zitupa kukatala kapati cakuti tatukonzyi kukambauka amoyo woonse? “Ulakatalusya bakateede.” (Is. 40:29-31) Sena mulapenzyegwa naa kukazyigwa? “Bika makani aako oonse mumaanza aa-Jehova, lino ulakutabilila.” (Int. 55:22) Sena zimwi ziindi mulaakulitenga? “Koya. Njooba amulomo wako.” (Kul. 4:11, 12) Sena mulaciswa-ciswa cakuti tamucikonzyi kubeleka kapati mumulimo wamumuunda? Jehova ulalumba nomumubelekela camoyo woonse, nokuba kuti mubeleka buyo asyoonto.—1 Kor. 3:6, 9.
4. Ino mbuti kusyoma Jehova mbokukonzya kutugwasya?
4 Ijanza lya Jehova ‘lilitandabikidwe, nguni uukonzya kulibweedezya?’ (Is. 14:27) Mbwaanga tulasyoma kuti Jehova ulakonzya kutugwasya mumulimo wesu, atuzumanane kukambauka ‘makani aa Jehova cabusicamba.’—Inc. 14:3.