Kweendelezya Ciiyo ca Kukomba Mumukwasyi
1. Mukuli nzi Jehova ngwaapa bazyali, alimwi mbuti mbobakonzya kuuzuzikizya?
1 Kuyiisya kasimpe kubana besu mukuli ngwaakatupa Jehova. (Dt. 6:6, 7) Bana beelede kwiiya kuyanda Jehova alimwi akuzyiba mbobeelede kusyomeka kulinguwe. Bazyali balabikkila maanu kapati kuzyintu zyakumuuya zyamukwasyi. Nkakaambo kaako baciinga camuzike musyomesi uucenjede ncobakabikkila bubambe bwa Kukomba Mumukwasyi. Eeci ciindi ncakwiiya Bbaibbele mvwiki amvwiki mbuli mukwasyi.
2. Ino bazyali beelede kucita nzi kutegwa boonse bagwasyigwe abubambe oobu bwa Kukomba Mumukwasyi?
2 Zibelesyo alimwi Ambokucitwa: Ncinzi ncomukonzya kwiiya ciindi ca Kukomba Mumukwasyi? Mutwe wamukwasyi weelede kuzyiba ziyandika mumukwasyi. Ulakonzya kubuzya nzyobayeeya bamwi akuzibelesya naa zilagwasya. Kunyoneka kuyoopa kuti Kukomba Mumukwasyi kakugwasya akukulwaizya. Ziindi zimwi kulayandika kubandika buyumu-yumu bakubusi mbobajana kucikolo. Mulakonzya kubandika munzila iikulwaizya makani aajatikizya kweebana, zicitika bakotoka kucikolo alimwi “[a]zisusi zyabukubusi.” (2 Ti. 2:22) Bamwi bazyali babelesya ciindi eeci kugwasya bana babo kuyaambele mumulimo wabukambausi. Mutwe wamukwasyi weelede kubikkila maanu kapati kuzyiba ziyandika mumukwasyi ambwakonzya kubasika amoyo.
3. Mbuti bazyali mbobakonzya kucita kutegwa Kukomba Mumukwasyi kakukatalusya?
3 Mbuti bazyali mbobakonzya kucita kutegwa Kukomba Mumukwasyi kakukatalusya? Amukulwaizye muuya wakuliiba alimwi abulemu. Amubelesye mibuzyo iitakatazyi azitondezyo kutegwa mukulwaizye kuyeeya alimwi kuti boonse batole lubazu. Mumikwasyi imwi bacita zisobano zyamu Bbaibbele, umwi aumwi kajisi cibalo cakwe, kacita mbuli mbokulembedwe mu Bbaibbele, naa kucita mbuli mbocakacitika. Takuli buyo kuti nzila eezyi zilakkomanisya pesi zilakonzya kugwasya bana benu kutola lubazu kutegwa njiisyo zyamu Bbaibbele zibasike amyoyo yabo. Amubelesye ciindi cakwiiya kubalumbaizya bana benu akaambo kakusolekesya kwabo, alimwi amube basungu kubayiisya zyintu zyakumuuya.
4. Ino mujisi mbaakani nzi kujatikizya bubambe bwa Kukomba Mumukwasyi?
4 Mutalubi Mbaakani Yenu: Mutalubi kuti cintu ciyandika kapati nkubagwasya kuzyiba mizeezo ya Jehova. (Ef. 3:17-19) Eeci caamba kuti mweelede kubasika amoyo bana benu. Amubapandulwide bamukwasyi wenu kaambo ncobeelede kuyanda kucita nzyayanda Leza alimwi ancocili kabotu kucita oobo. Kukomba Mumukwasyi kucitwa lyoonse kulayandika kapati mukuyaka mukwasyi wenu kuyaambele kumuuya. Kucita boobo kulabayiisya bana benu alimwi kupa kuti balibambile mbobakonzya kucita kuti naa bajana mapenzi. Amusyome kuti Jehova uyoomulongezya kuti naa mwazumanana kubikkila maanu Kukomba Mumukwasyi.