Sena Mulakonzya Kukambauka Mumazuba Aamu Nsondo?
1. Ncinzi ncotukonzya kwiiya kucintu ncaakacita Paulo abeenzinyina?
1 Mwakali mubuzuba bwa Nsabata, Bamajuda banji baku Filipi nobakali kulyookezya. Paulo abeenzinyina bakaswaya munzi ooyu ciindi cimwi munyendo zyabo zyabumisyinali. Kunyina wakali kukonzya kubajanina kaambo akaambo kakuti tiibakaunka mubukambausi buzuba oobo. Pele bakalizyi kuti Bamajuda bakalibungene kunze aamunzi kutegwa bapaile, aboobo bakaba acoolwe cakubakambaukila. Eelo kaka Paulo abeenzinyina bakakkomana ciindi Lidiya naakaswiilila antoomwe abamukwasyi wakwe akubbapatizyigwa! (Mil. 16:13-15) Mbwaanga bantu banji balalyookezya mubuzuba bwa Nsondo, mulakonzya kubelesya buzuba oobu kubakambaukila.
2. Ino mbuyumu-yumu nzi bantu ba Jehova mbobakalwana kutegwa kabakambauka mubuzuba bwa Nsondo kakunyina kukazyigwa?
2 Kukazyigwa Akaambo Kakukambauka Mubuzuba bwa Nsondo: Mu 1927, bantu ba Jehova bakakulwaizyigwa kukambauka mubuzuba bwa Nsondo. Eeci cakapa kuti bakazyigwe. Mucisi ca United States, bunji bwabakwesu bakaangwa akaambo kakusotoka mulawo wakulyookezya mubuzuba bwa Nsondo, kunyonganya bantu, akusambala kakunyina mapepa aakali kubazumizya. Pele bantu ba Jehova kunyina nobakacileka kukambauka. Muma 1930, bakabikka bubambe “bwakukambauka mutubunga,” basikumwaya bazwa mumbungano zili munsi-munsi bakali kuswaangana akubelekela mucilawo comwe. Ziindi zimwi basikumwaya nobakali kwaangwa, bamapulisa bakali kwaalilwa kubalesya akaambo kakuti basikumwaya bakali banji. Sena mulabalumba bakwesu aaba akaambo kakulyaaba nkobakacita kutegwa katukambauka mubuzuba bwa Nsondo kakunyina kukazyigwa?
3. Nkaambo nzi buzuba bwa Nsondo ncobuli buzuba bubotu bwakukambauka?
3 Buzuba Bubotu Bwakukambauka: Bantu banji balajanika aŋanda mu Nsondo. Inga baliliibide. Basizikombelo bamwi balayanda kubandika zya Leza mubuzuba oobu. Ikuti katujisi miswaangano yesu mu Nsondo, inga tulisamide kale kabotu mbuli mbotukonzya kusama notuunka mumulimo wakukambauka, aboobo tulakonzya kuunka mubukambausi twamanizya naa katutanatalika miswaangano. Ikuti kaciyandika tulakonzya kubweza cakulya cisyoonto.
4. Inga twalimvwa buti ikuti twabelesya ciindi cili mbocibede mubukambausi mubuzuba bwa Nsondo?
4 Ikuti twabelesya ciindi cili mbocibede mumulimo wakukambauka mu Nsondo, inga katunoojisi ciindi cakulyookezya. Tatukakatalukwi buyo, pele alimwi tuyookkomana akaambo kakuti twatola lubazu mumulimo uusetekene. (Tus. 19:23) Alimwi inga twaba acoolwe cakujana umwi uuli mbuli Lidiya!