Myeelwe Iijatikizya Mulimo Wamumuunda

Bakwesu banji batakwete, baalu alimwi abakutausi bakacinjila Cikolo Cakwiiya Bbaibbele ca Bakwesu Batakwete, calo cibagwasya kutegwa bakacikonzye kugwasya bambi mumulimo wakukambauka. Bakwesu bakamanizya cikolo eeci balagwasya mumulimo wakukambauka, bweembezi, alimwi akuyiisya, akaambo kaceeci balacikonzya kuyaka mbungano kumuuya. (Baefeso 4:8, 12) Nokwakainda myezi yobilo, mu Nsondo, February 27, 2011, baalu alimwi abakutausi bali 24 ibakali mukkilasi yanamba 49 bakamanizya kkoosi ya Cikolo Cakwiiya Bbaibbele ca Bakwesu Batakwete (BSSB) mudolopo lya Lusaka, eeci cikolo cilabagwasya kuba babelesi Banakristo basungu. Bakwesu batandila ku 350 bakakkomana antoomwe abasicikolo aaba mubuzuba oobo bwaalubazu.