Mbomukonzya Kukwabilila Buumi Bwanu
Kuba balondo kulagwasya kapati. Tweelede kusalazya mumaandeesu alimwi amumasena aakukombela.—Dt. 23:10-14.
Kamusowa tubi mubusena bweelede: Mutubi mulajanika tuzunda tunji. Ituzunda tuleta malwazi kuti twanjila mumaanzi amucakulya naa kukkala mumaanza, mpoonya tulakonzya kunjila mukanwa, eeci inga caleta malwazi. Tubi twamuntu tweelede kusowelwa mucimbuzi. Mutalekeli mafwumba aabanyama afwaafwi amaanda. Kamusalazya zimbuzi lyoonse. Kamuvwunika zimbuzi.
Kamusamba mumaanza: Mweelede kusamba kumaanza lyoonse. Kusamba ansipa naa amulota cilagwasya kujaya tuzunda. Kusamba buyo amaanzi takuzulili—maanza oonse ayelede kucumbwa ansipa naa amulota. Cilayandika kusamba mumaanza mwazwa kucimbuzi alimwi anomwamana kusinda mwana. Alimwi amusambe mumaanza mwamana kujata-jata banyama, kamutanajata cakulya, alimwi anomuyanda kusanina bana. Amubayiisye bana banu kusamba mumaanza alimwi akutasobanina afwaafwi acimbuzi naa abusena kuli tubi. Sena Ŋanda yanu ya Bwami ilijisi nkomukonzya kusamba mumaanza nomuli kumiswaangano?
Amubelesye buyo maanzi aanyina dooti: Malwazi alaceya mumikwasyi kuti kababelesya maanzi aanyina dooti. Maanzi aazwa muziziba, mumilonga, mumatanki aatavwunikilidwe, amumigodi ayelede kujikwa kutegwa mujaye tuzunda. Migodi yeelede kuvwunikwa. Mabbekete, ntambo, azigumbuli zibelesyegwa kutesya alimwi akuyobweda maanzi zyeelede kusanzyigwa akubikkwa mubusena busalala. Banyama tabeelede kuboola afwaafwi ampomuteka maanzi. Muŋanda, mweelede kubelesya cibbekete cijisi kapompi. Tamweelede kunjizya maanza aajisi dooti mumaanzi aakunywa.
Amukwabilile zyakulya kutuzunda: Amujike cakulya kutegwa mujaye tuzunda. Tuzunda tulavwula kufwambaana mucakulya cikasaala. Aboobo, cakulya ceelede kuligwa mbocamanina buyo kujikwa. Ikuti naa muyanda kuyobola cakulya kwamawoola ainda kuli obilo, mweelede kucibikka mufiliji naa moovoni. Alimwi naa muyanda kuyobola cakulya kutegwa mucilye aakale, amucivwunike. Eeci cilakwabilila kunzinini alimwi atuuka. Kamutanalya cakulya, amucikasaazye. Amusanzye micelo azisyumani kubelesya maanzi aanyina dooti. Eeci cilayandika kapati kuti kamuyanda kupa bana baniini zyakulya zitajikidwe.
Kamusowa dooti lizwa muŋanda: Nzinini, mapempya, alimwi ambeba, zyoonse zilijisi tuzunda. Eezyi zyuuka zilayanda aali dooti. Kamusowa dooti mubusena momukonzya kulivwukkila naa kulyuumpa buzuba abuzuba. Kamusalazya muŋanda alimwi mutanooyoboli maanzi aadooti.
Ikuti lyoonse kamwaatobela malailile aaya, muyookwabilila buumi bwanu abwamukwasyi wanu.