Kabbokesi Kamubuzyo
◼ Ino ciiyo ca Bbaibbele ceelede kutola ciindi cilamfwu buti?
Kunyina ciindi cibikkidwe citondezya bulamfwu bwaciiyo ca Bbaibbele. Nokuba boobo, kwiinda mukubona nzyobayandika abunji bwamakani ngobakonzya kwiiya aciindi comwe alimwi mbokunga makanze eesu ngakuti bayaambele kumuuya, tweelede kubona kuti baiya zibeela zyacibalo zili mbozibede. Tuyanda kuti bazyibe, bamvwisye, alimwi akubelesya nzyobayiya. Mu 2005 twakatambula bbuku lyakuti Ino Ncinzi Cini Bbaibbele Ncoliyiisya? Balakonzya kulimanizya bbuku eeli muciindi cisyoonto buyo, alimwi aabo ‘balibambilide kutambula’ buumi butamani balakonzya kwiiya mulindilyo zyintu ziyandika kutegwa balyaabe akubbapatizyigwa.—Mil. 13:48.
Masimpe kuti tabali boonse basikwiiya bayaambele munzila iikozyenye. Bamwi tababikkili kapati maano kuzyintu zyakumuuya alimwi bambi balamuka kumvwa zyintu nzyobayiisyigwa. Bamwi balibbaatidwe. Zimwi zibalo ziyandika kwiiya ziindi zinji kutegwa mumanizye cibalo coonse. Aawa mpotweelede kubelesya bupampu.
Cilakulwaizya kuti basikumwaya banji baleendelezya ziiyo zya Bbaibbele zinji mwezi amwezi. Akaambo kakujata bubi, andiza tulijana kuti twiiya buyo maminiti masyoonto amuntu, mpoonya twabalikila kuyoobona ciiyo cimbi. Ino eeci inga cabajatikizya buti bantu mbotwiiya limwi? Amweezyeezye mulilo. Mulilo ulakatazya kuyasya. Alimwi kuti tiimwasosela kabotu naa kuti nkuni zyaceya tuukonzyi kuyakisya kuti cakulya cibizwe. Ncimwi buyo aciiyo cicitwa muciindi buyo cisyoonto. Ciiyo cili boobo cilakonzya kulibonya mbuli kuti cili kabotu, pele sena ciindi ncotwiiya asikwiiya umwi aumwi cilizulide cakuti inga camugwasya kumvwisya twaambo, akuyeeya mbwakonzya kutubelesya twaambo ooto ntwaiya?—be p. 60 minc. 1-3.
Kweelana abukkale bwasikwiiya, inga cakonzyeka kwiiya cibalo comwe muwoola lyomwe naa kwiindilila buyo asyoonto, kakunyina kwiiya cakubindaana. Basikwiiya bayoocikonzya kuyaambele kuti mwiiyi alimwi asikwiiya boonse balajanika nsondo ansondo kweelana ambobakapangana akuba aciindi ceelede cakulanga-langa twaambo tuyiigwa.
Atubagwasye basikwiiya besu kuyaambele kumuuya. Kwiinda mukubelesya kabotu mabbuku eesu alimwi aciindi, tuyooba alukkomano lwakubbapatizya basikwiiya banji “mazuba oonse mane kusikila kumamanino aabweende bwazyintu oobu.”—Mt. 28:20.