Kabbokesi Kamubuzyo
◼ Ino mbuti basikugwasyilizya mbobanga babagwasya bazyali kuti bagwasye bana babo ikulilemeka ciindi nobali kumiswaangano?
Ikusobana ncilengwa buya kubana, tabazyibide kwiile kukkala kwaciindi cilamfwu. Mbuwamanina buyo muswaangano, mbuli kuti balaangidwe buya, ibana balatalika kubalika-balika akutandaana abananyina mu Ŋanda ya Bwami naa mumasena aambi muswaanganinwa, musiigwa myootokala naa mutuzila mwiinda bantu. Nokuba boobo, nkamasimpe kasimpi kaamba kuti: ‘Mwana uulekelelwa buyo ulausya muzyali wakwe insoni.’—Tus. 29:15.
Cilausisya kuti kuli bakwesu alimwi abacizyi bamwi bacembeede ibalicisa kapati akaambo kakutonkwa akuwisyigwa ansi abana babalika-balika. Eeci caleta mapenzi alimwi capa kuti bazyali alimwi ambungano kabanyonyoona mali manji ngobatalibambilide. Kutegwa bakwabililwe alimwi akuti batacisi bamwi, bana tabeelede kuzumizyigwa kuzuza-zuza alimwi akusobana mukati naa anze aa Ŋanda ya Bwami.
Bazyali bajisi mukuli wamu Magwalo wakuyiisya bana babo ikulemeka masena eesu aakukombela. (Muk. 5:1a) Kumiswaangano yesu ya Bunakristo misyoonto alimwi amipati, basikugwasyilizya bapegwa mulimo wakubona kuti ‘zintu zyoonse buyo zyacitwa kabotu ‘ alimwi akubona kuti kuli ‘bubambe buli kabotu.’ (1 Kor. 14:40; Kol. 2:5) Beelede kubalanganya kabotu bana kaitanatalika, anoicitwa alimwi anoyamana pulogilamu, mukati alimwi anobazwaanze. Ikuti mwana kabalika-balika naa katamvwi kwaambilwa, caluyando sikugwasyilizya ulakonzya kumulesya kucita ncacita mwana ooyo akumupandulwida ncocili cibi kucita boobo. Bazyali bamwana abalo beelede kwaambilwa caluyando kujatikizya penzi eeli akuti beelede kumulanganya mwanaabo. Bazyali beelede kucita kweelana ambobaambilwa.
Inzya kuli ziindi zimwi bana bavwanda alimwi abana bakomena-komena nobalila naa kunyonganya miswaangano. Basikugwasyilizya beelede kuti kabasika kakucili maminiti aali 20 kaitanatalika pulogilamu, kutegwa kabakonzya kubamba zyuuno zyakusyule zili mbozibede kucitila kuti bazyali balaabana baniini bakkale mpawo. Swebo tobamwi tweelede kubamvwida aaba basikugwasyilizya akutakkala aawo mpobasiya kuti kukkale baabo balaabana baniini.
Ikuti mwana kanyonganya bantu, muzyali weelede kubweza ntaamu. Ikuti naa muzyali tamulanganyi mwana ooyo amana uzumanana kunyonganya bantu, sikugwasyilizya weelede kumwaambila muzyali caluyando kuti amutole anze mwana ooyo. Ikuti twatamba bantu bapya kumiswaangano ibajisi bana baniini, atukkale munsi lyabo akubagwasya bana banoolila naa kunyonganya bantu munzila iili yoonse.
Cilatukkomanisya kubona bana baziimo zisiyene-siyene ku Ŋanda ya Bwami alimwi akubona mbobalilemeka kabotu muŋanda ya Leza. (1 Tim. 3:15) Kwiinda mukulemeka bubambe bwa Jehova bwakukomba, bapa bulemu kuli Leza alimwi balalumbwa abantu boonse mumbungano.