Kusama Kabotu Kupa Bulemu Kuli Leza
1. Nkaambo nzi ncotweelede kubikkila maano kujatikizya mbotulibonya?
1 Mbotuli Banakristo, buzuba abuzuba bantu balatulangilila. (1 Ko. 4:9) Tulakonzya kutondezya kuti tulamulemeka Jehova alimwi akuti tulamulumba akaambo kazyintu zyakumuuya nzyatupa kwiinda munsamino yesu alimwi ambotulilemeka.—Int. 116:12, 17.
2. Ino nkwiindana nzi kuliko akati ka Banakristo alimwi anzila zipya zyakusama zidumide munyika?
2 Kusalala Akucita Zyintu Munzila Iiluzi: Tweelede kulibonya munzila iitondezya zyeelelo zya Leza uusalala akucita zyintu munzila iiluzi. (1 Ko. 14:33; 2 Ko. 7:1) Mubili wesu, masusu, amaala zyeelede kuti kazisalala alimwi tweelede kulibonya kabotu. Ikutasama munzila iilibonya kabotu kulidumide mazubaano. Nokuba boobo, akaambo buyo kakuti muntu umwi ulaampuwo kapati mufilimu imwi naa muntu uusumpukide muzisobano tasami kabotu, takali kaambo keelede kupa Munakristo kucita boobo. Ikuti naa tutobela nzila zipya zyakusama, bantu ciyoobayumina kubona kwiindana kuliko akati kabaabo ibabelekela Leza wakasimpe alimwi abatamubelekeli.—Malk. 3:18.
3. Ino Magwalo nzi aatugwasya kuzyiba mbotweelede kusama?
3 Ikusama Kweelela Bakambausi Banakristo: Ciindi mwaapostolo Paulo naakalembela mulangizi Munakristo Timoteo, wakakulwaizya ‘bamakaintu kulisakatizya kwiinda mukusama kabotu, cabulemu alimwi acakulibatamika, munzila yeelede bamakaintu balyaamba kuti balilyaabide kuli Leza, nkokuti kwiinda mukucita milimo mibotu.’ (1 Ti. 2:9, 10) Lulayo oolu lulabeleka akuli bamaalumi. Ikutegwa tusinizye kuti tusamide bweelede, kuyandika kubikkila maano kapati. Zyakusama zyeelede kuti kazilibonya kabotu alimwi kazisalala, ikutali zitalibonyi kabotu alimwi zibusya mizeezo iitaluzi.—1 Pe. 3:3.
4, 5. Ciindi notusala zisani, ino nzyintu nzi nzyotweelede kubikkila maano?
4 Twaunka kukuula zisani, tweelede kuula zisani zyabulemu. Cilayandika kusala zisani zitajati alimwi zitabalangali. Zisani zyesu zili mbuli masipika. Kusama zisani zijata kapati naa zisani zitondezya mubili wesu mboubede cilakonzya kweezyanisyigwa ‘kukuyungizya volyumu kuti italike kusabila.’ Kucita boobo inga kwapa bamwi kutalimvwa kabotu. Alimwi inga kwaba kwaambilizya kuti tusololelwa amuuya wanyika eeyi wakutalilemeka.
5 Bunji bwesu tuula zisani zyakabelesyegwa kale. Nokuba boobo, tatweelede kubikkila buyo maano kukuccipa kwazisani eezyo. Kuyandika ciindi kutegwa tujane zisani zitukkwana kabotu, zitalembedwe-lembedwe alimwi zitasumpuli zyintu zyamunyika. Pele bakwesu alimwi a Jehova balalumba kusoleka nkotucita.—1 Ko. 10:31.
6. Mbulumbu nzi buliko mukusama akulibamba kabotu?
6 Mbubwenya mbuli kumwetamweta mbokubotya busyu bwesu, akwalo kusama akulibamba kabotu kutondezya bulemu kumulumbe ngotumwaya alimwi akumbunga njotwiiminina. Bantu batubona mumulimo wamumuunda, notuunka kumiswaangano alimwi anotuli aŋanda, balakonzya kutubuzya ncotwiindene abantu bamwi ambweni mukuyakwaciindi inga baakwaamba kuti: “Atweende anywebo, nkaambo twamvwa [akubona] kuti Leza mpali akati kanu.” (Zek. 8:23) Aboobo, umwi aumwi wesu atondezye bulemu kuli Jehova kwiinda munsamino yesu alimwi ambotulibamba.