Kuyungizya Luzyibo Lwesu Mumulimo Wakukambauka—Bukambausi Bwakubuleya Mucilawo Cambungano
Ikaambo Ncociyandika: Bantu banji bajisi bubi, aboobo tabajaniki mumaanda aabo masyikati. Mbungano zyakulwaizyigwa kuba abubambe bwabukambausi bwakubuleya kwiinda mukubelesya tutebulu naa twakubikkila mabbuku twakukuba kutegwa basimweenda nzila kababona. Tutebulu naa twakubikkila mabbuku twakukuba ituboneka kabotu inga twalombwa kuofesi yamutabi. Imbungano zilakonzya kukkopa zikwaankwani zizumizyidwe zyamumyaambo iisiyene-siyene a JW.ORG. Sena mwakakkomana kale kutola lubazu munzila eeyi yamulimo wakukambauka?
Nzila eeyi yapa kuti bantu banji batondezye luyandisisyo. Kucintoolo cimwi cipati mu Lusaka, banabukwete bamwi baku Croatia bakabona kakubikkila mabbuku kakukuba kaboneka kabotu mpoonya bakalomba kuti bakafwotole. Ba Haggai ibakali kubelekela mpawo buzuba oobo bakaamba kuti, “Banabukwete aaba bakali kuyanda kuzyiba ncaajisi mabbuku eesu. Mbwaanga tiibakali kukonzya kwaambaula kabotu Chingisi, twakabelesya kabbuku kakuti Good News for All Nations. Bakaamba kuti bakaswaangana a Bakamboni ba Jehova ku Croatia. Aboobo twakabatondezya webbusaiti yesu akubapa kabbuku kakuti Ino Ncinzi Cini Bbaibbele Ncoliyiisya? Bakakkomana kapati. Twakapana makkeyala akubakulwaizya kuti bakabonane a Bakamboni ba Jehova baakupiluka kulimbabo ku Europe.”
Amusole Kucita Eeci Mwezi Uuno:
Nomukomba mumukwasyi, amubandike ibusena nkomukonzya kucitila bukambausi bwamukwiizya. Amucite zitondezyo alimwi akusala mibandi iikonzya kukkomanisya bunji bwabantu mucilawo canu.