Lugwalo Luzwa ku Kabunga Keendelezya
Nomuyandwa Bakwesu a Bacizyi:
“Lyoonse tulamulumba Leza notumubandauka nywebo nyoonse mumipailo yesu, nkaambo tatuleki kuyeeya mulimo wanu walusyomo akubeleka kwanu kwaluyando alimwi akuliyumya kwanu akaambo kabulangizi mbomujisi mu Mwami wesu Jesu Kristo kumbele lya Leza wesu alimwi Taateesu.” (1Tes. 1:2, 3) Eelo kaka aaya majwi mabotu atondezya mbotulimvwa kujatikizya ndinywe! Tulamulumba Jehova akaambo kandinywe alimwi amilimo mibotu njomucita. Ino twaambila nzi boobu?
Mwaka ooyu wainda, mwajisi bubi kubeleka “mulimo wanu walusyomo” alimwi “akubeleka kwanu kwaluyando” mumilimo ya Bwami. Bunji bwanu mwajana nzila zyakuyungizya mulimo wanu. Bamwi balongela kuyoobelekela mumasena naa kuzisi zimbi ooko ikubulide basikumwaya ba Bwami. Ibamwi bayungizya mulimo wabo kwiinda mukutola lubazu mubukambausi bwakubuleya. Banji bakakulwaizyigwa kubeleka bupainiya bwakugwasyilizya ciindi ca Ciibalusyo, naa mwezi ngwaakaswaya mulangizi wabbazu, naa ciindi nokwakali mulimo waalubazu mu August 2014. Nokuba kuti bukkale bwanu buliindene-indene, tulibwene kuti mulamubelekela camoyo woonse Jehova, alimwi tulamulumba kapati akaambo kakucita boobo. (Kol. 3:23, 24) Masimpe, “mulimo wanu walusyomo” upa kuti tumulumbe Jehova!
Kuyungizya waawo, twakalumba kapati akaambo ‘kakubeleka kwanu kwaluyando’ mumilimo yamayake iindene-indene iicitwa nyika yoonse. Mayake aayo alayandika kapati, mbwaanga mweelwe wabantu ba Jehova wazumanana kuyungizyika. (Is. 60:22) Amuciyeeyele buyo, mweelwe waatala wabasikumwaya wakasika ku 8,201,545, mpoonya mweelwe waakati-kati waziiyo zya Bbaibbele wakali kusika ku 9,499,933 mwezi amwezi. Akaambo kakuyungizyika ooku, mitabi iimwi iyandika kukomezyegwa naa kubambululwa. Alimwi eeci caamba kuti kuyandika Maanda aa Bwami aambi. Kunze lyaboobo, maofesi aabasanduluzi alayandika mumasena manji munyika kutegwa basanduluzi besu kabakkala alimwi akubelekela kubusena mwaambo wabo nkowaambaulwa.
Aboobo inga twalibuzya kuti, ‘Ino inga ndacita buti kutegwa ndigwasyilizye kuyaka masena aaya?’ Tobamwi ambweni inga twacikonzya kulisungula kuyoogwasyilizya kuyaka. Tacikwe makani naa tatujisi luzyibo lwakuyaka, toonse tulijisi coolwe cakupa zintu zyesu ziyandisi kumilimo eeyi iiyandika kapati. (Tus. 3:9, 10) Ciindi tente lyakubunganina nolyakali kuyakwa, bana Israyeli bakakulwaizyigwa kapati kupa, cakuti kwakaba kwaambilizya buya kuti bacileke kuleta zintu. (Kul. 36:5-7) Cakutadooneka, zikozyanyo zyamu Magwalo zili boobu zilatunjila mumyoyo alimwi akutukulwaizya. “Kubeleka kwanu kwaluyando” mumbazu eezyi mumulimo ooyu uusetekene, akalo nkaambo kambi katupa kumulumba Jehova!
Tulijisi kaambo kabotu katupa kukkomana ciindi notubona kuliyumya kwabakwesu. Mucikozyanyo, amubone cakabacitikila bakwesu baku South Korea. Kuzwa mu 1950, bakwesu bacili bana-bana mucisi eeci bali kupika ntolongo kwamyaka iindene-indene akaambo kakutatola lubazu mutwaambo twacisi. Kwamyaka minji, bakwesu baindene-indene baliyumya mubukkale oobu kakunyina kuleka kusyomeka. Eelo kaka cikozyanyo cabo cakuliyumya ciyumya lusyomo lwesu!
Kucisi ca Eritrea, bakwesu botatwe bakkala muntolongo kwamyaka iinda ku 20. Bamwi, kubikkilizya abacizyi antoomwe abana babo, bali kwaangwa kwamyaka misyoonto. Nzila zinji zyabelesyegwa kutegwa baangununwe, pesi kunyina noiba yomwe yazwidilila. Nokuba boobo, bakwesu aaba bazumanana kusyomeka nomuba muziindi zikatazya kapati. Tatubalubi mumipailo yesu bakwesu aaba basyomeka.—Rom. 1:8, 9.
Masimpe, bunji bwanu tamwaangidwe akaambo kalusyomo lwanu. Nokuba boobo, bamwi akati kanu balaliyumya akaambo kapenzi lyabucembele, kuciswa-ciswa, kukazyigwa abanamukwasyi batasyomi naa kukazyigwa abaabo mbobakwetene limwi, kubikkilizya amapenzi aazyibidwe buyo andinywe nyolikke. Nokuba kuti cili boobo, mulazumanana kumubelekela Jehova cakusyomeka. (Jak. 1:12) Tulamulumba kapati akaambo kakucita boobo. Kuliyumya kwanu cakusyomeka akalo nkaambo kambi katupa kumulumba Jehova.
Inzya, kubeleka kwanu cakusyomeka, acaluyando, alimwi akuliyumya kwanu kutupa twaambo tubotu ‘twakumulumba Jehova, nkaambo mubotu.’ (Int. 106:1) Tulamuyanda kapati nyoonse, alimwi tupaila kuti Jehova amuyumye, amubambe, alimwi akumulongezya kutegwa muzumanane kumubelekela kukabe kutamani.
Tobanyoko,
Kabunga Keendelezya ka Bakamboni ba Jehova