Amwiiye Lusyomo Lwabo
1. Ino ndibbuku nzi ndyotunoobelesya mu Ciiyo ca Bbaibbele Cambungano kutalikila munsondo ya October 19?
1 Kutalikila munsondo ya October 19, 2015, tuyootalika kwiiya bbuku lyakuti Amwiiye Lusyomo Lwabo mu Ciiyo ca Bbaibbele Cambungano. Bbuku eeli lilanga-langa zibalo zyamu Bbaibbele zyabaalumi abamakaintu basyomeka bali 14. Lyakalembwa munzila iitugwasya kubayeeyela mbobakabede bantu aaba, akutugwasya kubona kuti bakali bantu ncobeni ibakajisi buyumuyumu ciindi nobakali kubelekela Jehova. Alimwi mubbuku eeli muli ziiyo zizwa muzibalo eezyi nzyotukonzya kubelesya mubuumi bwesu.—Heb. 6:12.
2. Amwaambe zibeela zimwi zijanika mubbuku lyakuti Amwiiye Lusyomo Lwabo.
2 Zibeela Zijanika Mubbuku Eeli: Bbuku eeli lilabikkilizya ciindi alimwi amamaapu aakonzya kutugwasya kuzyiba ciindi alimwi abusena nkwaakali kukkala muntu umwi aumwi waambidwe. Kuyungizya waawo, cibalo cimwi acimwi cilijisi cibeela cijisi mutwe wakuti “Twaambo Ntomweelede Kuyeeya . . . ,” calo ciyootugwasya kuzinzibala kuyeeya zibalo alimwi akubelesya ziiyo nzyotwaiya. Alimwi bbuku eeli liboneka kabotu, lilijisi twaambo tunji, alimwi lilijisi azifwanikiso zizekawidwe kabotu calo citugwasya kuti tuzikkomanine zibalo eezyi.
3. Ino ncinzi ncotweelede kucita kutegwa tugwasyigwe kwiinda mukwiiya bbuku eeli?
3 Mbomukonzya Kugwasyigwa: Lugwalo iluzwa ku Kabunga Keendelezya iluli kumatalikilo lulatukulwaizya amajwi aaya aakuti: “Amweezyeezye zyintu izyakali kucitika ciindi nomubala. Amusole kulimvwa mbobakali kulimvwa bantu baambidwe mu Bbaibbele akubona zyintu nzyobakali kubona. Amweezyanisye mbobakacita nobakali mubukkale bumwi abumwi ambomwali kunga mwacita nomwakali ndinywe.” Pele kweezyeezya zintu izyakali kucitika tacaambi kweezyeezya zintu zitako, muciindi caboobo, caamba kweezyeezya ncocaamba cibalo alimwi akubeetelela bantu baambidwe mucibalo. Kucita boobo kuyandika ciindi alimwi akuzinzibala kuyeeya. (Neh. 8:8) Ikuti ciiyo kacitalikila akati kacibalo, sikweendelezya weelede kusaanguna kwiinduluka ciiyo cakabandikwa nsondo yamana mutuvwaluvwalu tuli 30 naa 60. Ulakonzya kubuzya mubuzyo omwe naa yobilo yakwiinduluka kumamanino ikuti naa ciiyo tacibikkilizyi cibeela cakuti “Twaambo Ntomweelede Kuyeeya . . . . ”
4. Nkaambo nzi ncotuyandika kwiiya bbuku lyakuti Amwiiye Lusyomo Lwabo?
4 Tukkala munyika iiyanda kunyonganya lusyomo lwesu munzila ziindene-indene buzuba abuzuba. Bbuku eeli—kubikkilizya azibalo zijanika mu Ngazi Yamulindizi izizwa mubbuku eeli—ncipego kuzwa kuli Jehova icitugwasya kuyumya lusyomo lwesu. (Jak. 1:17) Atulibelesye kabotu kwiinda mukujanika lyoonse ku Ciiyo ca Bbaibbele Cambungano alimwi akutola lubazu ciindi notwiiya bbuku eeli.