INDONESIA
Twakatobela Malailile Aboobo Twakafwutuka!
Ba Blasius da Gomes
NOBAKAZYALWA 1963
NOBAKABBAPATIZYIGWA 1995
BUUMI BWABO MUBUFWAAFWI Mwaalu iwakalanganya butanga caluyando ciindi nokwakali manyongwe aajatikizya bukombi munsumbu ya Ambon, yalo iili akati ka Nsumbu zya Maluku.
MU January 19, 1999, kutamvwana ikwakali kuyaabwiindila akati kaba Mozilemu a Banakristo kwakabusya nkondo kubusena bwakali kulampa makkilomita otatwe afwaafwi ampondakali kukkala. Kwakaba lupyopyongano lupati.a
Nindakamana kutola mukwasyi wangu kubusena kwatakali lupyopyongano, ndakatumina basikumwaya bambi fooni kutegwa ndimvwe naa bakali buti. Ndakabaambila kuti bakkazike myoyo akuti batanikuunki mumasena imuli manyongwe. Kumbele, baalu bakaswaya butanga akubuyumya kumuuya alimwi akubukulwaizya kunooswaangana akukomba mutubunga tusyoonto.
Ofesi yamutabi yakatwaambila kuti tubalonzye basikumwaya boonse ibakali kukkala mumasena mwakali manyongwe, eelyo malailile aaya twakaambila mikwasyi minji yakajatikizyidwe. Mukwesu umwi iwakakaka kulonga kumbele wakajaigwa ankamu yabantu yakajisi zilwanyo. Pele boonse ibakatobela malailile aakazwide kuofesi yamutabi bakafwutuka.
a Manyongwe akazumanana mucooko coonse ca Maluku kwamyaka yiinda kuli yobilo alimwi akapa kuti bantu banji kapati baasiye maanda aabo.