MIBUZYO YABASIKUBALA

Ncinzi basikuvwukkula zyakaindi ncobakajana icitondezya kuti munzi wa Jeriko wakazundwa mukaindi kasyoonto buyo?

Lugwalo lwa Joshua 6:10-15, 20 lwaamba kuti basikalumamba bana Israyeli bakali kuzinguluka munzi wa Jeriko ciindi comwe abuzuba kwamazuba aali cisambomwe. Mubuzuba bwaciloba, bakauzinguluka munzi ziindi zili ciloba. Mpoonya Jehova wakapa kuti bwaanda bwamunzi wa Jeriko ibwakaimvwi nji buwe, aboobo bana Israyeli bakazunda munzi ooyu. Sena kuli zintu zili zyoonse nzyobakajana basikuvwukkula zyakaindi izitondezya kuti munzi wa Jeriko wakasaalwa mukaindi kasyoonto buyo, mbubwenya mbuli Bbaibbele mbolyaamba?

Kaindi, munzi wakali kusaalwa ciindi basikalumamba nobakali kuzinguluka bwaanda bwanguwo, kabalibambilide kuulwana. Ikuti kusaala kwatola ciindi cilamfwu, bantu mumunzi bakali kulya cakulya ncobakayobwede akusyaala buyo cisyoonto. Kumamanino basikalumamba nobakali kuuzunda munzi, bakali kubweza zyoonse nzyobakali kuyanda, kubikkilizya acakulya cili coonse icakasyaala. Nkakaambo kaako basikuvwukkula zyakaindi bakajana cakulya cisyoonto naa kutajana cili coonse mumatongo aaminzi yaku Palestine iyakazundwa munzila eeyi. Pele matongo aamunzi wa Jeriko aliindene. Bbuku litegwa Biblical Archaeology Review lyaamba kuti: “Icintu cakajanika mubunji kapati muminzi yakanyonyoonwa, kunze lyazintu zyabulongo, akali maila.” Bbuku eeli lilayungizya kuti: “Ikujana maila manji boobu ncintu cilibedelede.”

Bbaibbele lyaamba kuti bana Israyeli tiibakabweza cakulya cili coonse mu Jeriko akaambo kakuti Jehova wakabalailila kutacita boobo. (Joshua 6:17, 18) Alimwi lyaamba kuti bana Israyeli bakaulwana munzi wa Jeriko ciindi camupeyo, kuzwa buyo nobakamana kutebula, ciindi nokwakali maila manji aakayobwedwe mumunzi. (Joshua 3:15-17; 5:10) Aboobo, akaambo kakuti kwakacili maila manji mu Jeriko kuzwa nowakasaalwa munzi, cisinizya kuti kusaala ooko kwakatola buyo ciindi cisyoonto, mbubwenya mbolyaamba Bbaibbele.