Mbocicikonzya Kuzyiba Zintu Zili Munsi-munsi Cinyama Camumaanzi Citegwa Dolphin

Ma dolphin alalizya milosi naa tulizyo twiindene-indene akuswiilila kuvwiilizya kwatulizyo ooto kutegwa azyibe ziliko munsi-munsi. Kwiinda mukulangilila mbwaacita ma dolphin aaitwa kuti bottlenose, basayaansi basola kupanga mincini iisumpukide yamumaanzi iikonzya kubeleka kabotu kwiinda mincini njobabelesya lino.

Amulange-lange cicitika: Mboicikonzya kuzyiba zintu zili munsi-munsi kulaigwasya kujana nswi ziyubide mumusenga ansi aalwizi alimwi akwaandaanya akati kanswi amwala. Kunze lyaboobo, kweelana ambwaakaamba Keith Brown, syaazibwene umwi ku Heriot-Watt University, Edinburgh, Scotland, wakati kakucili musinzo uulampa mamita aali kkumi, dolphin ilakonzya “kuzyiba lwiindano luliko kujatikizya zibikkilo zijisi maanzi buyo, maanzi aamunyo, maanzi aamusamu naa mungwimba.” Basayaansi bayanda kupanga mincini iikonzya kucita zintu mbubwenya mbuli zinyama eezyi.

Basikuvwuntauzya bakalanga-langa mbwaalila ma dolphin alimwi ambwaamvwa akusola kukkopa kulila ooko alimwi ambwaacikonzya kumvwa. Aboobo bakapanga muncini uucikonzya kucita oobo uujisi bumpiyo-mpiyo bubeleka amagesi ibubikkidwe mucipaipi citasiki kumita yomwe. Muncini ooyo uubikkwa kumuncini wamumaanzi uuli mbuli cilwanyo citegwa torpedo, ubambidwe munzila yakuti kaucikonzya kulanga zili kunsi aalwizi, kujana zintu zizikkidwe kunsi mbuli ntambo naa mipaipi, alimwi akuzyiba bwini mbozibede kakunyina kuziguma. Basikupanga muncini ooyu babona kuti kumbele uyoogwasya mumasena mupangilwa mungwimba. Muncini ooyu weelede kusumpuka kwiinda mincini iibelesyegwa mazuba aano caboola kumakani ngoukonzya kupa, akugwasya basyaazibwene kubikka mincini yamumaanzi iikwela mungwimba abusena buli kabotu kapati, kuzyiba mpowanyonyooka muncini mbuli kuba akalwaanzi nokaceya mane buya akuzyiba mpoisinkide mipaipi.

Ino muyeeya buti? Sena kucikonzya kuzyiba zintu nkocicita cinyama citegwa bottlenose dolphin kwakabako kwiinda mukusanduka naa kwakalengwa buya?