Mbwanjila Mumaanzi Muyuni Uutegwa Gannet

Bayuni bategwa Gannets bajanika kulwizi alimwi ciindi nobanjila mumaanzi kuzwa mujulu inga balizuzide kapati lubilo lusika ku 190km/h. Lubilo ndwajisi ciindi nanjila mumaanzi, lweelede kumupa kuzazauka citaambiki, pele eeco tacicitiki pe. Ino ucikonzya buti kufwutuka alimwi akunjila mumaanzi cakwiinduluka-induluka?

Amulange-lange: Katanasika amaanzi, waakwelela kusyule mababa, calo cipa kuti aceye mbuli muvwi. Kunze lyaboobo, ulapanga cikwabilila meso alimwi akupompa muya munsingo amucamba kutegwa atacimvwi kucisa nanjila mumaanzi.

Ciindi nanjila mumaanzi, mulomo wakwe, mutwe alimwi ansingo ziba mbuli muvwi. Eeci cipa kuti maanzi ataumi buyo kulubazu lomwe lwansingo. Mukaindi buyo kasyoonto, muyuni ooyu ulatalika alimwi kubona kabotu mumaanzi.

Ino muyuni ooyu usika alamfwu buti kuyaansi mumaanzi? Lubilo ndwanjila andulo lulakonzya kumupa kuyaansi mamita aali 11, pele ulakonzya kuzumanana kuyaansi kwiinda mukubelesya mababa aatavwungulukide kapati alimwi amaulu aakwe. Mane buya, bayuni aaba bamwi balainda mamita aali 25 kuyaansi mulwizi. Asika aawo mpagolela, ulaibuka kabotu-kabotu kuboola atala, akuuluka alimwi.

Amweebelele bayuni bategwa gannets mbobanjila mumaanzi

Basikuvwuntauzya bakapanga malobboti aali mbuli bayuni aaba kutegwa kaagwasyilizya kuyandaula akugusya zintu zili mumaanzi. Malobboti aaya akali kulangilwa kuti kaawuluka, kunjila mumaanzi akuuluka alimwi. Nokuba boobo, nobakali kwaasola, yomwe yakatyokauka noyakauma amaanzi canguzu. Eeci cakapa kuti basikuvwuntauzya baambe kuti malobboti ngobakapangide “tanaakali kukonzya kunjila mumaanzi mbuli bayuni beni.”

Ino muyeeya buti? Sena kunjila mumaanzi kwamuyuni uutegwa gannet kwakabako akaambo kakusanduka naa kwakalengwa buya?