Nzila 2-Kamubikkila Maano Kuzyintu Ziyandika Kumubili

“Kunyina muntu wakasulide kale mubili wakwe mwini; pele ulausanina akuubamba kabotu.”—Baefeso 5:29. Kutola ntaamu ziyandika kulanganya mubili wanu kulakonzya kugwasya kapati kubuumi bwanu.

◯ Kamuba aciindi cakulyookezya. “Inkankamanza yomwe iili aluumuno nimbotu kwiinda maanza obile aazwide milimo iikataazya iitakutyi moyo.” (Mukambausi 4:6) Akaambo kakuvwula kwazyintu nzyobacita bantu mazuba aano kwapa kuti kabatajani ciindi cinji cakoona. Pele koona kulayandika kapati kubuumi bwamuntu. Buvwuntauzi butondezya kuti ciindi muntu naona, mubili alimwi abongo zilalibambulula, calo cigwasya kuyeeya zyintu akuba amizeezo iikkalikene.

Koona kulagwasya kuti mubili kaulikwabilila kutuzunda akugwasya kuti muntu kataciswi-ciswi malwazi mbuli bulwazi bwaccuka, kulebuka kwamubili, bulwazi bwamoyo, kkansa, kuneneya kapati kwamubili, bulwazi buboola akaambo kakutyompwa, alimwi nobuba bulwazi bwakuluba. Muciindi cakucita zyintu zipa kuti muntu ataoni mbuli kulya nswiiti naa kunywa zyakunywa zimwi zipa muntu kuti ataoni, tweelede kutobela ncouyanda mubili nouyanda kuti toone. Bantu bapati banji baloona mawoola aali ciloba naa lusele masiku aali woonse kutegwa balimvwe kabotu, kukatalukwa akubeleka kabotu milimo yabo. Bana basyoonto balayandika koona mawoola manji kwiinda aaya. Bakubusi bataoni mawoola manji balaba apenzi lyakutayeeya kabotu alimwi balakonzya koona ciindi nobeenzya mootokala.

Koona kulayandika kapati ciindi notuciswa. Mibili yesu ilakonzya kuzunda malwazi amwi, mbuli cisyini, ikuti katoona ciindi cilamfwu alimwi akunywa meenda manji.

◯ Kamwaabikila maano menyo aanu. Kusalazya menyo mwamana kulya, ikapati kuti muyanda koona, kulakonzya kumugwasya kulikwabilila kumalwazi aamenyo alimwi akumukwabilila kuti mutasweekelwi menyo. Ikuti katutajisi menyo, tatukonzyi kulya kabotu. Kwaambwa kuti bazovwu tabafwi akaambo kakucembaala, pele balafwa akaambo kakutalya kabotu ciindi menyo naamana. Bana ibayiisyigwa kusalazya menyo bamana kulya balakomena kabotu mubuumi bwabo boonse.

◯ Mweelede kubonana abasilisi. Ikuti kamucisidwe, mweelede kubonana abasilisi. Kufwambaana kuunka kucibbadela kulakonzya kumukwabilila kuti mutaciswi kapati alimwi akutabelesya mali manji kuula misamu. Aboobo ikuti kamutalimvwide kabotu, mweelede kubusilika bulwazi muciindi cakucesya-cesya buyo zicisa.

Kuunka-unka lyoonse kubasilisi bazyibidwe kuti mbaasyaazibwene mukusilika kulakonzya kugwasya kukwabilila malwazi mapati mbubwenya mbwakonzya kukwabililwa mukaintu uumitide ikuti wabonana amusilisi uucibwene.a Nokuba boobo, amuzyibe kuti basilisi tabakonzyi kucita maleele. Kusilikwa kwini-kwini kuyoocitika buyo ciindi Leza “[aaku]bambulula zyintu zyoonse kuti zibe zipya.”—Ciyubunuzyo 21:4, 5.

[Bupanduluzi buyungizidwe]