NCOLYAAMBA BBAIBBELE

Paradaiso

Ino Paradaiso ninzi?

NZYOBAAMBA BANTUBantu bamwi bayeeya kuti Paradaiso mbusena bwakweezyeezya buyo. Bamwi bayeeya kuti mbusena buli mbuli muunda mubotu mwalo muli bantu bapona buumi butamani alimwi babeleka milimo iikkomanisya.

NCOLYAAMBA BBAIBBELE Ibbala lyakuti “paradaiso” lilabelesyegwa kupandulula munzi wabantu wakusaanguna, nkokuti muunda wa Edeni. (Matalikilo 2:7-15) Ibbaibbele lyaamba muunda ooyo kuti bwakali busena bwancobeni mwalo mwakali kukkala banabukwetene bakusaanguna balo batakali kuciswa akufwa. (Matalikilo 1:27, 28) Akaambo kakuti bakamuzangila Leza, banabukwetene bakusaanguna bakasweekelwa munzi wabo wa paradaiso. Nokuba boobo, businsimi bunji bwamu Bbaibbele bulaamba kuti kumbele bantu bayookkala mu Paradaiso alimwi.

NKAAMBO NZI MAKANI AAYA NCAAYELEDE KUMUJATIKIZYA? Mbwaanga Leza ngusiluyando, nkokuti cileelela kwaamba kuti uyoobalongezya bakombi bakwe basyomeka kwiinda mukubapa buumi bubotu muparadaiso. Alimwi cileelela kuti nguweelede kubaambila ncobeelede kucita kutegwa abakkomanine. Ibbaibbele lyaamba kuti mulakonzya kukkomaninwa a Leza kwiinda mukwiiya nzyayanda alimwi akuzicita.—Johane 17:3; 1 Johane 5:3.

“Jehova Leza wakalima muunda . . . ku-Edeni, nkabela mpempawo mpaakabika oyo muntu ngwaakabumba.”—Matalikilo 2:8.

Ino Paradaiso ili kuli?

NZYOBAAMBA BANTU Bantu bamwi basyoma kuti Paradaiso ili kujulu, kakuli bamwi basyoma kuti iyootalisyigwa aano anyika kumbele.

NCOLYAAMBA BBAIBBELE Paradaiso yakusaanguna yakali waano anyika. Leza wakalenga nyika kuti kauli munzi wabantu kukabe kutamani. Ibbaibbele lyaamba kuti Leza wakapanga nyika kuti kailiko lyoonse. (Intembauzyo 104:5) Alimwi lilaamba kuti: “Majulu majulu aa Jehova, pele nyika wakiiaba kubana ba-adamu.”—Intembauzyo 115:16.

Tacigambyi pe kuti Bbaibbele lilaamba cisyomezyo ca Paradaiso anyika. Mulinjiyo, Leza uyoobalongezya bantu abuumi butamani. Kuyooba luumuno alimwi alukamantano. Kuciswa alimwi akupenga ziyoomana. Alimwi bantu bayookkala calukkomano anyika.—Isaya 65:21-23.

“Tente lya Leza lili aabantu, . . . alimwi lufwu, talukooyoobako limbi, akwalo koomoka, kulila nokuba kucisa takukooyoobako limbi.”—Ciyubunuzyo 21:3, 4.

Ino mbaani bayookkala mu Paradaiso?

NZYOBAAMBA BANTU Zikombelo zinji ziyiisya kuti bantu bali kabotu mbabayookkala mu Paradaiso. Pele bantu banji tabacizyi cini ncocaamba kuba muntu uuli kabotu. Bamwi bayeeya kuti nkuunka buyo kucikombelo alimwi akupaila.

NCOLYAAMBA BBAIBBELE Ibbaibbele liyiisya kuti “balulami” mbabayookkala mu Paradaiso. Ino mbaani baluleme mumeso aa Leza? Tali muntu upaila buyo pele kataciti kuyanda kwa Leza. Bbaibbele lyaamba kuti: “Sa Jehova ulabotelwa zipaizyo azituuzyo mbuli kuswiilila majwi aa-Jehova? Bona! Kuswiilila nkubotu kwiinda kupaila, kuzumina nkubotu kwiinda mafuta aabagutu bambelele.” (1 Samuele 15:22) Mubufwaafwi, “balulami” ibayoopona mu Paradaiso kukabe kutamani mbabaabo batobela malailile aa Leza kweelana ambwaalembedwe mu Bbaibbele.

NCOMUKONZYA KUCITA Kutobela malailile aa Leza takubikkilizyi buyo kuunka kuzikombelo pe. Kulabikkilizya abukkale bwanu bwabuzuba abuzuba, bukkale bwanu bulakonzya kumukkomanisya Leza naa pe. Inga mwaiya kumukkomanisya Leza kwiinda mukubala Bbaibbele cakusitikila. Alimwi takatazyi kukkomanisya. Ibbaibbele lyaamba kuti “milawo yakwe tiiminyi.” (1 Johane 5:3) Leza uliyandide kumulongezya akaambo kakusyomeka kwanu kwiinda mukumupa Paradaiso.

“Balulami bayookona nyika, bayookala alinjiyo lyoonse.”—Intembauzyo 37:29.